عماد عبد الغنى الحصرى (مصر-مقيم بالسعوديه)
مشاركه شعر العامية قصيده (اسأل عليا)
إسأل عليا كل مــــــــــــده
دا الشعر شاب و العمر عدى
ابعتلى كلمه او حتى ورده
دا القلب داب وايديا بارده
ادعيلى فى كل سجـــــــده
انا حالتى حال وفى وقت شده
غبت عنى وقلبك منُه شالنى
دا عيونى فى غيابك عماله تسألنى
واصحابى و جيرانى تملى بتلومنى
مش قادر على بعادك يارب صبرنى
دى جوارحى مش راضيه وتملى زعلانه
ايدى اليمين واقفه وايدى الشمال همدانه
والأورده ناشفه وجفونى تعبانه
وعيونى ورموشها مكسوره دبلانه
و اللحيه طولانه وسمونى مولانا
عهد واسمعيه وخديه عليا
مش هسيبك وقلبك دا ليا
وهترجعيلى وثقتى بالله قويه
و الجمعه اللى جايه هعملك مليونيه
لجل أسأل عليكى كل رايحه وكل جايه
محدش شاف اغلى الاحباب
ابو وش ابيض لون السحاب
والشعر اصفر والخدود عناب
وعطره جنه بيملا الدنيا ضباب
واحلى بسمه ترجع الفرح اللى غاب
كتبت اسمك على كل باب
وبسمع اغانى حزن وعذاب
من هان الود لعبد الوهاب
لعبد الحليم بلاش العتاب
وبعتنا مع الطير المسافر جواب
اما صحيح الهوا غلاب
كتبت دعوه فى كل كتاب
إوصل يارب الود اللى داب
يارب .. ياجابر قلوب العباد
اغمض وافتح وألقى حبيبى عاد
