ردا على فيلم قناة الجزيرة … اعادة نشر
إقرا وذاكر
…………
لو مش عارف إقرا وذاكر
دا احنا عشانّا الكون يتّاخر
إحنا حمام ف سلامنا ولكن
جوّه الحرب سيوف وخناجر
خطوّة جندي ف يوم ما تدب
تكسر ضهر الجبل الصلب
إحنا جنود من عند الرب
براكين ع الظالم والغادر
واحنا سنابل قمح وخير
طبليّتنا تساعي الطير
إحنا تاريخ بدء التعمير
واحنا إيمان أجراس ومنابر
إحنا طريق للحق خليل
ولأحلام يوسف تأويل
إحنا نجوم على شط النيل
طول الليل قاعدين نتسامر
واحنا أمان لغريب لو عدّى
نفرش حضن الحب مودّه
نخبز نبض الروح يتغدّا
وبنحزن ساعة ما يسافر
اللي يمد الإيد لإيدينا
بنشيله ف حبابي عنينا
واللي يكون محتاج يلاقينا
على بابه من غير ما يشاور
إحنا الأخ بيسند اخوه
واحنا الإبن بيرفع ابوه
مركب عمره ف يوم ما يتوه
ولا يغرق ف البحر الهادر
إحنا العامل والفلاح
واحنا لكل الكون إصلاح
باب مفتوح من غير مفتاح
وسفينه وقبطان ومغامر
واللي يحاول يوم يعادينا
أو يتطاول حتى علينا
يرمش بس قوام يلاقينا
كل الشعب ف مصر عساكر
كل الشعب …
ف مصر عساكر
…………………………………..
محمد ابو العبادى
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
