إنتحار ..مستبقة الشعر الحر والتفعيلى للشاعرة سحر جمال حبيب من مصر

{{ إنتحـــــــــــــار }}

كلمات \ سحر جمال حبيب

بعزمك تشرب معايا

كل أنواع .. العذاب

مــــ الجراح .. صبّيت عشانك

الآلام من غير حساب

من جروحى

رُحت احلّى

جوّه فنجانك .. عشان

لسّه فاكره .. رغم موتى

إنت ما بتشربها ساده

من زمان واخدها عاده

رغم وقت الحزن اللى

مالى أجواء المكان

حبّه برضه .. اسقيهولك

حلو .. والسكر زياده

والأكاده ..

جاى وبتاخد .. عزايا

زى روح خدها .. الوباء .

آسفه جداّ

إنى اقولك

أصلى ضلّيت الكلام

قصدى قاتلها .. الغرام

إيد وخنجر مــــ الوفاء

دمى مالى كفوف إيديك

هو نفس الكف كان

كنت بنبوسه زمان

من حنان

قلب مات مقتول فى حبك

حتى سكينة الجريمه

خارجه من ضلعى .. سليمه

وأمّا شفت فــــ قلبى لسّه

حتّه حيّه

قُمت طاعن قلبى .. تانى

طعنه تانيه

والغريبه .. سبت سكينة .. الجريمه

فوقها بصمة إيد .. عليها

بصمه لإيديك الشريفه

شاهده ضدك ..

والوصيّه ..

روحى كاتباها .. عليّة

كات دموعى

فـــــ حبر قلمى ..

مش بتنزل من عنيّه

نازله تصرخ .. من ضلوعى

وقت موتى

قصدى وقت مابين .. وبين

وقت لحظات { لإحتضار } ..

إوعوا حد وبعد موتى

تانى يفتح لى القضيه

والسؤال فيه كلمتين

يبقى مين الجانى قولوا ؟!

راح تردوا تقولوا مين ؟!

وإنتو اهو بتعزوا فيّة

أيوه أنا كنت .. الضحيّة

بس برضه كنت .. جانى

لمّا سلمت بإيديّه

روحى للقلب الأنانى

إكتبوا سبب الوفاه

زى ما سمّاها قلبى

{ إنتحــــــــــــــــــار } ..