*مسابقة مهرجان همسة الدولي للآداب والفنون /فرع شعر العامية ..
*الاسم : ولاء إبراهيم حجازى
*الدولة :مصر- محافظة الدقهلية – مدينة المنزلة
* عنوان القصيدة/ (إنت)
لو تبرأ نفسك إنت
من جراح سببتهالي
لو تعيش ف الدنيا وإنت
قلب فاضي وعقل خاوي
لو هتحكي ميت حكاية
أو هتهرب من وعودي
إنت عايش جوة نفسك
إنت كاره ليه وجودي
لو صادفت الحب مرة
عشت ماضي مُر قاسي
لو قابلت زمان ف واحدة
قلبها كان قلب قاسي
عايشة بس لنفسها
طبعها وياك أنانى
تُهت فيها وبعدها
حب صادفك بعده تاني
والنصيب وياك معاها
كان بيغلب ف الأمانى
عشت وحدة فظيعة جداً
عشت تايه حد تاني
إنت ليه جاي تحكم
ع البنات من بعدها
إنت ليه جاي تظلم
والوعود مش قدها
إنت عارف ايه ف حياتي
قبل منك يعني إيه
إنت تصدر ليه قرار
إنت أصلا جاي ليه
ياحبيبي الدنيا لسة
فيها أجمل م اللي راح
اخرج إنت م اللي فاتك
عيش حياتك وبراح
اوعى يجري العمر منك
أو تعيش حتي ف جراح
يالي كاره فرح قلبك
ده الحياة سهلة وبسيطة
عيش حياتك انسي جرحك
عمرنا ف الدنيا ليلة
يالي بايع قلب حبك
اخطف اللحظة الجميلة
تلقي حُب باقي عمرك
ده الحياة سهلة وجميلة ..
كلمات/ الشاعرة ولاء حجازى
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
