إنسية ولا جنية .؟ .قصيدة للشاعرة / منى الفؤاد

انا نصى انسيه

و التاني جنيه

اوعى تقرب لي وانا طالعة م المية

شايلة ف إيديا قلوب بالحب مكوية

الموج رماها وراح والملح يكويها

جالها في يوم ملاح علشان يداويها

راح بص ف عنيها

شاف الدموع فيها

فسألها إيه مالك

قالت رماني الشوق

ف بحوره غرقانة

ببحث على مرسى

أرتاح وفيها ارسى

لكن إذا جالي

عاشق يقول حبيت

راح ينكوي بناري

واسقيه المرار في الكاس

وان قالي حبي أساس

مش راح اصدق يوم

انه حبيب صادق

يكفي اني مليانة

أوجاع وكلي جراح

يا عم يا ملاح