إنسي وعيش – خاص بالمسابقة – قصيدة عامية
—————
لو حتحس ف مرّة بقهرك
إفرد ضهرك
واعزم أمرك
واطلق مُهرك
ماتوطيش
لو راح تعتر
أو تتكسر
أو شيء أكتر
لم جروحك
لملم روحك
جوّه الريش
زمنك آلمك
دوس علي ألمك
وامسك قلمك
ولا تبكيش
حلمك راح
نام وارتاح
واحلم غيره
ف أرض براح
برّة الشيش
واجه نفسك
طوّل نفسك
قول ما ف نفسك
ماتخبيش
إكسر خوفك
لحدود شوفك
فوت ف الريح
لو ح تخافها
ماتعديش
وانت جت فرصة
إمسك فيها
إوعي تفوتك
وتعديها
أحسن تندم
تاني عليها
لو ماتجيش
من أحزانك
ألّف نكتة
ونكتة ونكتة
واضحك والعب
يك وشيش
خد م الدنيا
أحلي مافيها
وارمي همومها
ومُر مافيها
ماتخليش
لو ح تعيش دايما
مهزوم
أو مهموم
أو مغموم
تبقي حياتك
زي مماتك
إنسي وعيش
