الهام احمد سعد
حساب فيس بوك
https://www.facebook.com/
قصيدة شعر العامية
إيه السِّر فيك ؟!
***************
مش لازم ….
نشوف الدنيا سودا ف كل وقت
حبة حاجات …
بتعمل ف الحياة الفرق
ضحكة قلب بتحبه
هزارك ويّا أصحابك
شط اسكندرية بصوت فيروز
وقت الشروق ع البحر
قد إيه بتحس إن الدنيا صافية
تسبيح الطيور …
لحظة خلاص السّما من أسر ليلها الطويل
تبدأ تبان الشمس لحظة بلحظة
والبحر يشرب عتمة الليل
اللى خلت لونه إسود
تِطبَع عليه الشمس نورها
والسما بتلونه بلون الحياه
ازاى تشوف السما والبحر ساعة الشروق….
ومتقولشى عليه الله؟!
إزاى متعشقشِ اسكندرية وبحرها
رغم انه مش أجمل بحار الكون
يمكن يكون أبسط كتير
السِّر فى سحره كبير
يقدر يخليك
ترمى همومك فيه
وتغسل الحزن اللى غمَّى عنيك دموع
فتلاقى موجه بتحضنك فبتحتويك
وامّا تضيق الدنيا بيك
ترجعله تانى تكلمّه
يا بحر قولِّى السرّ فيك؟
تسمع لصوته بيناديك
أنا المكان اللى بيرسم بسمة ف وشوش البشر
هنا ابتدت كل القصص …
وشهدت على دمع الكتير
لمّا الزمان بيهم غَدر
والسِّر إنى صبور قوى
واسع قوى وبراح
وكل من يشتكيلى
لازم يعود مرتاح
مَلحِى يِدوِّب أى هم
فاضحك ولا تِغتمّ
وعيش حياتك بابتسامة
عيشها ولاتندم
وبلاش تشوف الدنيا سودا ف كل وقت
حبة حاجات
بتعمِل ف الحياه الفرق …
لمّا بترمى الهموم
وتبص فوق للسمَا
وقت الشروق ع البحر
