قصيدة خاصة بالمسابقة العامية
قصيدة بعنوان افروديت ماتت
++++++++++++++++
ذرة حياة متكتفة
فى حبل الوريد
بينها وبين الموت
مسافة صغيرة
شهقة نفس متكتفة
بريحة الدم اللى فاضل م الحياة
وياهلترى فى الموت نجاة؟؟
اية اتجاهى فى الحياة؟؟
الموت مصير والا قدر؟
يالعبة الدنيا الغريبة اتكلمى
و لملمى جرحى اللى فاضل
من سنينى
والا اقولك ……مويتينى
اقطعي نبضي فـ وريدي وريحينى
مش هعيش انا جوة حضنك
وسط صبرك الفظيع
لو كان باقيلى لسة ذرة فى الحياة
فانا رافضة اكون نفس اتجاهك والجنون..
مش عاوزة اكون تمثال جديد لافروديت-
— هادبح فؤادى واقطعه وارمىه بعيد..
لو كان مصيرى اكون
فى النحت تمثال من حديد
هاكسَّره واقدر علية
هاقطع بايدى وريدى
وانزف من جديد
مش معضلة ولا مشكلة
انى افارق الوجود
دي المشكلة اكون شبيهة افروديت
نفس الحياة نفس الرتوش
وانا مش اله للحب بالشكل الجديد
وان كان هواك بالشكل دة ف ا بعد بعيد….
…. ايروس خلاص مات من زمان
وقطعت حبل الذكريات من كام سنة..
…. وان كنت فاكر لعبيتك هتكون انا
فسفينة العشق القديمة اتكسرت
غرقت زمان
وافروديت الذكريات ماتت كمان
افهم وركز فى الكلام
انا مش هكون لك افروديت
