البداية..مسابقة الشعر العامى بقلم / أحمد الفقى من مصر

الاسم/ أحمد الفقي
موبايل/ 01117105050
E-Mail: [email protected]
نوع العمل/ قصيدة عامية
إسم العمل/ البداية
……………………..…………………..

نبدأ و بسم الله نقول..
قلبي لـ عيونك.. جواب مقفول..
بعنيكي بس.. بتفتَحيه
قلبي ده.. مِلكك.. خُديه
مفاتيح بيبانه بين ايديكي
مِدّي شوقك وادخُليه
وانتي داخلة.. بس سَمّي..
انتي ليا.. دعوة امي..
إنتي طريق فوق للسحاب.. بامشيه
هامسك قلم وابدأ..
من حروف إسمِك
حروفه تعمل كلام..
كلامي يعمل قصايد..
وقصايدي تعمل ديوان..
دواويني تعمل كيان..
في الأصل كان..
من حروف إسمك.. بابتديه
حروف إسمك..
تجمَع حياتي ف كلمة واحدة..
زمان رسمتِك ألف واحدة..
كان نفسي افوز منهم بواحدة..
شوفي إحساسي وحلاوته..
لما الاقي الألف…. واحدة
كل شيء جواكي عَدّى وزاد عن اللي حلمت بيه
قبل امّا اشوفك..
كانت حياتي ملَخبَطَة
انا صفحة بيضا مَسَحت منها الشّخبَطة..
و بـ خط إيدك اكتبي كل الحروف
قبل منك عيشت وحدي..
قلبي مفروشلك ف عَدّي..
واتقدّمي كل الصفوف
هايحسدوني عليكي عارف..
ماتلوميش ماهو حَقُّهُم..
أنا لو مكانهُم..
هابقى واحد منُّهُم
ماهو قبل ما الكون يعرَفك..
كانت الأفراح.. ضيوف
عمري اللي فات من قبل منك..
من غير ما احس.. عيشتهولك
أحلام سنيني ف كل أرض زرَعتها..
و هالِمّها.. أول ما انولِك
كلامي م الليلة ابتدى..
ولو تبُصّي على المَدَى..
تِلقي الكلام محبوس
حاسس.. زي انتصرت ف ملحَمة..
كإني عَدّيت السما..
كإني.. فوق نجومها بادوس
وكإني عَلاء الدين بادعَك بإيدي فانوس
ف جاني مِنّه جِنّي.. وجننّي..
بصورة في الننّي..
مرسومة فوق في السما..
بـ نجوم و ماس مرصوص
كلامي م الليلة ابتدى..
طمعان مشاعري.. يِوصَلولِك
ولو هاجمع لُغات الكون..
أنا بالكلام صعب اقووولِك
ثُمّ الكلام مني اتسَرَق..
ثُمّ الكلام فوق الوَرَق..
كان نفسي بس اسألِك..
تِرضي تخَلّي الحياة.. مقسومة بين قلبين؟؟
بس كان صعب الكلام..
رغم المسافة.. مش بعيدة..
كل الحكاية.. خَطوتين
بيني و بينِك.. شِبّاكين
من عندي راح افتح.. شباكي واستَنّى
أطلَع بـ روحي تطوف.. عشمانة في الجنة
عن نفسي باتمنّى…
تِفتَح قلوبنا بابين

#أحمد_الفقي