#الجَخ_لما_يِجُخّ طول عمرك و انت عمال تِجُخ و ف الأونطة بقيت أحسن قوال... انا كتبت كتير و قليل بس مالقيتش غير ف حلاوة مصر كلام يتقال... و إن جبت سيرة نسوانها هو فى ياناس اجدع و أجمل من كدة جمال.... غيرش بس اللى غاوي شهرة على حساب الوطن لجل ما يقبض دينار و ريال.... يطرش كلام و يعَيِب على ست البنات اللي من غيرها مافيش ف الدنيا رجال.... ياللي اسمك هشام و الشهامة عنك غايبة نسيت شبراوي و علي لجل شوية عيال.... شكرت ف اللى خلفت الفيران اللى بيتسحبوا من الانفاق و ضميرهم لولادنا قاسي و قَتال.... و عيبت ف اللي عمر مابطنها شالت غير الكرامة اللي ليها ف الأصل سلسال.... عجبي عليك يا واكل ناسك و عامل صعيدي و انت ف النسب بطال.... انا صحيح زعلان ع الأبريا بس لغير مصر خلاص مش راح ادخل قتال.. اصلي عملتها كتير و ماخدتش غير خناجر من اللي راميين عليا التوكال.... و أى حد زيك هايعمل فيها ثورجي يشيل سلاحه و يشد على هناك الرحال.... بلاش صويت الولايا الرجولة بجد أن كل واحد لهمُه يكون شيال.... و احنا راح نشجب و نعترض.. بس خلاص مش راح نموت عشان الأندال... واللى مش عاجبه كلامى.. بقول له.. عمر الحجر ما يجرح و لا يخدش الجبال.... و لا النجوم تخبي نور الشمس و لا الرصاصة تقدر تفوت ف الرمال.... و هاتفضل بهية رافعة راسها..و الخونة تحت مداسها.. تغنى أحلىَ موال.. يا ليل ياعين عجبي ع اللى فاتح عيونه و رامي جنونه. مش شايف من ورا الغربال.... عامل فيها عبيط و ع الرايجة بيزيط بياع كلام و مالوش أى أعمال...... فالح بس يجُخ و بالسم يبُخ بس والله كُلة هاينِخ قدام أم الأبطال..... إللي هي مصر و الباقى مهما كان قدام الحجر الصوان يا فسل....شوية رمال....... إدوارد المصري
