الحلو..مسابقة الشعر العامى بقلم / إيهاب يحى ابو طه من مصر

قصيدتى للمسابقة ..عامية
إيهاب يحى أبو طه من مصر
,,,,,,,,,,,,
الحلو
لون وكيان وصوت
يعنى اختصار كل الجمال
فى تلات حروف
الحلو
لون السما لو ريح النظرة
لو توه المشاوير
لو حاضن القمرة
فى عتمة المقادير
الحلو ابيض
زى لون الصفا
أحمر بلون الدفا
أخضر بلون توب الربيع
لما يغطى الأرض
يستر ضهرها
الحلو بصة مها
ع الساقية والدواوير
والحلو قلب الأم
لما يشيل الرضا
ويسيل حنانه هدير
والحلو صفحة بريئة
فى الحل تبقى عشيقة
والحلو زهرة رقيقة
تملا عينيك تباشير
الحلو دمعة ألم
بيها الذنوب بتدوب
والاحلى سجدة ندم
ترجع جديد وتتوب
الحلو شمعه
الحلو كون مليان سكون
مع لحن يشبه للى كنت بتعشقه
قبل الميلاد
الحلو يشبه للبلد دى
ف عزها
الحلو ساكن جوة شجرة توت
بتعشق هزها
الحلو ترعه بتروى شوقنا لضلها
والحلو قلة ف ايد صبية
تطفيك بنقطة تنزها
الحلو
بنت ف تانية ثانوى
مشاعرها عدت سنها
عكاز كلامها بينكسر
وسكوتها أبلغ منها
احساس برئ زى الطيور
لما بمزاجك تخطفك
أو غصب ..أنت تروحلها
الحلو
ليل عاشق سمر
ياخدك معاه تونسه
تشبك مع رمش القمر
وتميل شفايفك تلمسه
الحلو
أكبر م الكلام لو يوصفه
ولكل واحد فينا رؤية بتشبهه
الشعر لقطة من شعور بنستفه
والحلو هو اللى يشده ويندهه