الحُكم قبل ما نعرف المتهم.قصيدة للشاعر / خالد عاطف ابو العزم

النمله .. زى الكلب .. زى الجمل

جوّه التراب ..

لمّا يحين الأجل

الكل نفس الموتَه .. إلا الجبان

ميّت يوماتى بخوفُه ..

يال الخجل .

ماشيه الحياه .. ما بين أليف .. ومطيع

تكتب سطور المجد للجرابيع

كَتَبِت تاريخ ..

النبش فيه مقرف .

أصعب كتير م النبش ف البلاليع

الجو مش ولابد ف المنشيه

مافيش حصان ..

ومافيش محمد على .

كان فيه بارات من ييجى سبعين سنه

قَفَلت .. ولسّه الخلق مسطوله

ف الحقانيه كل شئ للبيع

م الحق .. ل رباط الجِزم .. ل البنات

قمل الذمم .. والفلّايات

وأيمانات الطلاق

والحكم قبل ما نعرف المتهم

مافيش مكان .. إلا وعليه رجيلين

ومافيش عينين ب تبص .. إلا بنَهم

ونش المرور ساحب رُخَص كل النجوم والقمر

قال ممنوعين م السفر

ومرافقة العشاق على الكورنيش

وخَد بطاقة واحده سَريّحَه

موجوده .. ع الريحه

ماعاشتشى ..

لكن ع الرصيف وقَفت تبيع العيش .

الإتحاد الاشتراكى جراج

وانا قلبى برضو جراج

ولّع زمان زيّه

وماعادشى من ضيّه

غير دفترين للكارته .. والسايس

واقف .. وحيد .. حابس

ف شفايفه آخر ضحكه ماضحكهاش

وكام نَفَس من شيشه ف التجاريه .

ف عز خنقة زحمة المنشيه

صادق أمين قاعد ب يكتبنى

وانا ب اكتبه ..

والبحر مش مبسوط

شايفنى نورس .. فوق عامود مربوط

وانا شايفُه .. صاحب رخصة الأحلام

درويش ..

ف رأيه العمر مش أيام

عدّادُه يبدأ بس وقت الدفا

يضرب إيديه ف الخفا

من شنطته يطلّع قمر محبوس

شاعر مخاوى ..

بالحياه ملبوس

أقول له .. ليه الدنيا قَلعتنا

ولبّستنا طوب حيطان بيتنا

وب تجرى زى الهُبل ف الزفّه

يضحك .. يخلّى الحزن يتوفّى

يضحك .. لحد الشمس ماتجيله

وعروسة .. وسط البحر .. تنادى لُه

يقول سامحنى ياصاحبى .. ويروح لها

ويسيب لى قلبُه ..

وكوبَّيات الشاى

وفِكر رايح للحقيقه وجاى

م النمل يبدأ .. ينتهى بالجَمل

أضحك كأنى حكيم وصابُه الخبل

مااعرفشى ليه ف الدنيا ب ابقى جرئ

وليه قصاد قلبى .. ب احس بخجل !!