خاص بمسابقة مهرجان همسه الدولي
مسابقة الشعر العامي
قصيدة. الساحره
ايهاب عبدالنبي احمد محمد
الساحره..
جمعتي فيا حاجات كتير اتفرفتت
كل اللي مرت بيا إما إتفلسفت أو شوهت
أكبر حاجات ف الحب ممكن تقتله
إنتي الجواب لسؤال حَبيت كتير إني أسأله
ولا حد جاوب ع العيون ولا حد قام لبى النِدا
إنتي اللي شوفتي الضحك ف عيوني بُكا
فَسرتي أكبر مشكله جوا الوريد
ودخلتي بين القلب والنبض الذي
مَل الكلام ع الحب ل أكبر أغبيا
حَل السلام الداخلي جوايا منك. نظرتك!
فيكي العقد حليتني قبل ما حَلتك فيا..
إنتي التي كنتي لحياتي المعجزه
وإن كان إذا قلبي هيقدر يملكك
ف إزاي هيقدر يكتبك
كل القصايد عاجزه قدام ملامح م السما
واخده العيون من أحلى زوايه من القمر
حُبك أمر
شرياني إنه يضخلك أشعار
حُبك نهار فيا إبتدى ف اديت قرار للأورده تبدأ تعيش
حُبك مُوصل كل دقه بقلب كان محروم يعيش
وحدك قريتي الخط جوايا فَكيتي أكبر شفره ف الملكوت
حَررتي أجمل حِس من إيد العدو.
أصبحت حُر وضحكتي أكبر دليل ف إتأكدوا
إنتي البدايه لكل شئ كان إنتهى
قربك نهى ع الحزن جوا الضحك والروح والولا.
قلبي بلا نبضك يموت.
حَبات عيونك كات هديه من الإله
قلبي دا مات قام جات رموشك فأرتويت
وصحيت على صورتك بكيت
ف ياريت م عرفت ناس ولا كنت شوفت عيون بشر
الكره ساد بين الجميع وتخلف القلب إنتشر
لكنما
حُبك نمى جوايا ف صحيت من جديد
إنتي الأكيد ف الشك والصح لو كان بالغلط
رمشي إختلط بعيون سيادتك ف الزحام فبقيت كده
بسم اللي جرى الدم جوا الأورده
بسم اللي خلت سكتي مليانه نور
بسم اللي شالت إسمي من إيد الغزاه
هيا التي خلت خُطايا بيفرحوا ف الليل وعايشن الحياه
الفرح أصبح نقش ف خيوط الولا
الشعر وإتسرسب ندى مع كل نظره من العيون
هيا اللي حَلت لغز أكبر مسأله فيثاغورث عاجز جنبها
والحل ف إيديها يكون.
دا يا ليل متيم قلبي ف عنيكي الجمال.
مَر الكتير ع النبض عمره ف يوم م مال
إنتي اللي وصلتي الورق والحبر فيا بالقصيده
الشعر سال من عيني لما عنيكي كانت ف العروق
الدم وإتحول صور مبقتش عارف اوصفك
وإزاي هقول ف رموش سيادتك كلمتين
صممتي إنك تدخلي القلب اللي عمره ما يعرفك
ولا يشبهك ولا حتى ينفع يحضنك
إزاي يومين ف القرب منك حسسوني بإنك إنتي
فيا قبل ما يتخلق جوايا طين.
الحب أكبر مجتمع ف الوحده ينفع تحضنه
الحب أطهر حد ممكن يسكنك لحظة ضياع
والعشق مش ممنوع ما دام جواك حاجات إتحركت
ف إزاي هنمسك دمع حد عيونه فجأه خلاص بَكت
إنتي اللي حولتي الجماد
ليمام وطاير ف السما وعصافير
حُبك هديه من “القوي” “الله” يقدر قلبي و يحبك كتير
قلبي اللي أضعف م الهوى
شافك جناح لصمامه ف إتعلم يطير
حَلق بعيد ع الناس وكنتي الناس هناك
انتي الدفى ف البرد لحظة لإمتلاك
والضمه من بين الضلوع
بسم اللي خلت ضحكتي تملى الدموع
والحزن فرح ف ثانيه واحده من الزمن
أنا نفسي بس أوهب حياتي هديه ليكي بدون تمن
أول ما شوفتك تمشي ع النبض إتولدت
أول سلام ف القلب كات جواه تسيل
إنتي اللي ف العتمه الونس
وانتي اللي إن تهت الدليل
قلبي اللي عَلم حِسه إنه بيعشقك
وإتحدي كل المغريات
لجلك هشيل العمر وسنينه العجاف
أنا حتى من ساعة ما شوفت الليل ف عينك مش بخاف
عَلمتي أضعف قلب يجمد من مفيش
وصلتي كل ما فيه بفيه
حُبك كَافيه من خير وشر الناس خُديه من وسطهم
أرضك عمار.
فرميت بِذُوري ف قلب رمشك كات ورود
وجمعت من خدك غُنا
ف مليش غِنى عنك ولا هقدر اسيبك تتعبي
يااللي إنتي زي إزاي هغيب وإزاي هسيبك تهربي
أنا سكتك ف إتسرسبي أمشي عليا وعلمي قلبي هيصحى بخطوتك
ميت وطالب نبضه واحده ومعفره
فبقيتي إنتي الأورده ولقلبي كنتي الساحره
