قصيدة : شعار المرحلة .. للشاعرة / هبة حلاوة

“وحدي لكن ونسان”

أصبح شعار المرحلة

عشر سنين مترملة

وعمري غاوي هرولة

لسة التلاتين متقفلة

فجأة أربعين ومكملة

شايلة شيلتي ومحملة

على قلب عاش شقيان

“وحدي لكن دفيان”

م البرد دوقته ف حضنكم

والغربة كانت وسطكم

والطعنة م الغريب تهون

بس الأكادة جت منكم

عمري اللي فات عربون

تمن المهانة ف قربكم

عمري اللي جاي ملعون

لو لسة صاينة ودكم

م أنا الغريبة ف حيكم

وأنا الغلطانة ف العنوان

“وحدي لكن متصان”

“وحدي ومش زعلان”

“وحدي وأنا الكسبان”

“وحدي عشان إنسان”

“وحدي هحل الأسئلة”

أحسن شعار للمرحلة