الشيخ سيد : قصيدة للشاعرة / أسماء كمال

ماهو اصل الشيخ سيد جدّي

مُقرىء ومُحفّظ للقرآن

وزمان ف العيد على أيامه

الخير شوفناه اشكال والوان

كانت فرحتنا ف لمتنا

والعيد بيعيّد من بيتنا

وتملّي نكمّل سعادتنا

بصنية فتّة لكل جيران

جدّي دا كان لبسه القفطان

وجبّـة منـورها الرحمن

وتملّي الذِّكر على لسانه

بيحصّن بيتنا من الشيطان

كان قلبه تملي مجمّعنا

على حرف الله بيجمعنا

وف كل اعيادنا يمتعنا

بتكبيرة تصحصح

الف ميدان

انا جدي كان قدوة وهيبة

قـوّته في الكلمة عجيبة

عصايته ترن من الشارع

وقعتها ع النفس مريبة

وبمسحة بإيده يهـدِّينـا

وف حضنه الطاهر يرقينا

ترتيـله بهمـس يخلينا

نشبـع حنـية مع طيـبة

جـدّي دا كان أعظـم إنسان

ف وجوده ما كان للبعد مكان

في كُل اعيادنا وف خــيره

بيجمّع لنا شمل الخـلّان

ويفــرق فـرحة يهادينا

وبروحة الهادية يراضينا

دا مهما اعياد مرِّت بينا

ولا تشبه يوم اعيادنا زمان

واهو جدي خلاص ساب دنيتنا

للضلمة تعشش في بيوتنا

والغل بقاله مابينا مكان

مبقتش اعيادنا بتسعدنا

ومفيش معنى لجبران خاطر

والفرحة بيخطفها الشاطر

وصوت الحق خفاه الباطل

والبركة اهي قلّت في عشيتنا