العفريت والصعلوك..مسابقة السيناريو المسرحى بقلم / محمد عبد الفضيل من مصر

مسرحية

 

العفريت والصعلوك

 

[ كوميديا سياسيه ساخره ]

 

تأليف

 

محمد عبد الفضيل

 

 

 

 

اللوحة الأولي

——————

– ساحة للمظاهرات ذات خلفيه ثورية تمثل بشاشة عرض سينمائي وهي مرتفعه بعض الشيء تجسد بعض مشاهد الثورات العربية بإختلاف بلدانها .. المشهد ممهد برصيف .. ومدخلين يمين ويسار .. توجد صوره كبيرة علي أحد الجانبين تجسد الحاكم أو الديكتاتور مواجهه للجمهور ..

[ يمكن وصف الصورة بما يخدم الدكتاتوريه الساخره مثلا كأن يخرج لسانه للشعب ]

– قبل بدء العرض يدوي صوت في جميع أرجاء المسرح

المذيع :- نبأ هام :-

أعزائي المشاهدين هذا العرض لا يمس أي شخص بإسمه أو صفته أو منصبه سواء كان مؤيدا أو معارضا .. محبا أو كارها للوطن .. بل ان العرض لا يمس بلدا بعينها فقضيتنا جميعا هي القضيه العربيه إنما كل الشخصيات من واقع الخيال وأي تشابه بينها وبين أي شخصيه من الواقع هو من قبيل الصدفة …. شكرا لكم

[ يرفع الستار علي شاشه العرض تجسد الثورات العربيه يزامنها إظلام لوضوح العرض ]

ثم إضاءة تامه :- يزامنها دخول مجموعات من الشعب يمين ويسار المسرح من الثوار ترفع لا فتات [ عليها شعارات تنادي بالحريه]

المتظاهرين :- إرحل .. إرحل .. تحيا الحريه .. عيش .. حريه .. عداله إجتماعيه

[ مكررين ] [ ملتفين في دائره تجوب خشبة المسرح حتي تقف مواجهه للجمهور] [ يتفرق المتظاهرين . يجلس البعض علي الرصيف ]

شخص [ 1 ] ينظر لصورة الرئيس :- يا سلام يا خويا وكمان مبتسم قوي ..هترحل يعني هترحل .. وحياة أمي هترحل .. دا انا مخنوق منك قوي

– شخص [ 2 ] :- منحنيا يحمل حجر ويقذف به في الصوره مرددا خد يا اخي

– الجميع يصفق مرددين [ هــيـــــه ]

– يرتد الحجر ليصطدم برأسه من الخلف بصيحه [ آيآي ]

شخص [ 2 ] مين فيكم اللي ضرب

– الفلاح :- الضربه جايالك من ورا يا اخي

– المرأ ة :- محدش حدفك يا خويا هي تلقيح جتت ولا ايه

– العجوز :- ياولاد إنتم هتقعدوا تتخانقوا وتسيبوا قضيتكم ياله اهتفوا

[ يعاودون الهتاف مره أخري بنفس العبارات ]

– أحد المتظاهرين من الشباب الخنافس يهتف بميوعة [ إرحل ]

– الفلاح لصاحب الصوت:- إخشن يا وله شويه ليقولوا عليها ثورة خنافــــس

– المرأه :- ما يقولوا يا خويا .. هوا إحنا لاقينا قبل كـــده وما طلعناش ..

– العجوز :- ايوه بس لازم يخشن شويه

– المراة :- كويس إنه واقف معاكو طب دا انا امبارح روحت اتظاهر في حته كده يعني كانت كلها تحرش والعياذ بالله وأنا قلت لنفسي لأ

– الخنفس [ بدلال ]:- فين الحته دي يا اختي

– الفلاح :- يا ساتر اعوذ بالله أسترجل يا وله خلي ربنا يبارك في الثورة

– يقوم الجالسون علي الرصيف ويبدأون في الهتاف

يعـلـــو هتاف الجميع [ إرحل ] [ الحريه ] [ السلام ] مكررين [ السلام ]

– يقطع هتافهم إندفاع أحد الأشخاص يبدو أنه بطل العــــــرض

[ صلاح الدين ]

يقف ليشاهدهم [ متعجبا وهم يرددون ] إرحل .. الحريه .. السلام ..

الشخص [ المتعلثم ] :- إس إس إس السلام

صلاح الدين [ بسخريه للشخص ] :- عقبال ما تكمل الكلمة يكون الميكروباص طلع

صلاح [ يخرج عملة من جيبه ] :- مين يا جماعة اللي بيقطع التذاكـــــــر

صلاح [ وقد لفت إنتباه الجميع ] :- فين يا جماعة الميكروباص اللي طالع

الــفــــــلاح :- ميكروباص إيه يا أخينا إنـتــــــا

صلاح الدين [ ببساطه ] :- ميكروباص السلام مش هما نقلوا الموقف هنا

ولا ايه مش إنتم رايحين برضه السلام

المراة :- مــوقـــف إيه يا أ بـــو مـوقــــف

[ بدلــع ] :- إسم الله إنتا بتستهبل علينا ولا ايه

صلاح [بسخريه ] :- يا ستي إنتي ما هو كل مره ينقلوا الموقف

ويزودا الأجره كانت بجنيه بقت اتنين بقت تلاته ..

[ مقتربا بهمس في إذنها ] :- ولا إنتوا هتركبوا ببلاش

المراة :- [ مبتعدة ] :- إيه يا راجل ده هـنــركــب ايــه قلة الأدب دي

العجوز :- يا أخينا دي مظاهـــره علشان الريس يرحـــل

وإحنا بنطالب بالحريه والسلام ودلوقتي الــريس هييجي

لينا آه حاكم الريس ديمقراطي حاسس بحال الشعب

لازم ييجي .. [ منفعلا بحماسه ] لازم ييجي [ مكـــرر ا ]

صلاح [ مستنكرا ] :- ييجي هنا .. الريس أبقوا قابلوني .

[ يقترب العجوز هو و زملائه يضيقوا الخناق علي صلاح وهم يهتفون ]

:- لازم يييجي .

[ يبتعد صلاح عنهم في نفور ]

صلاح [ بإستنكار ] :- يا ساتر إيه يا شباب الأخلاق دي والتــزنــيــــق ده .

الخنفس [ بميوعه ] :- لازم ييجي الله .. ما هو لازم ييجي .. الله .. [ مكررا ]

صلاح [ ساخرا ] :- إظن ناقص تقول خــليه ييجي ونجيب مليجي .

الشخص [ المتعلثم ]–

إنتا مش [ مكررا ] مصدق إن الريس هييجي يلبي[ مكررا ] مطالبنا .

صلاح [ ساخرا ] :- لأ لأ مش مش مش مش مصدق

[ يقترب منه بمضايقه هامسا في أذنه ]

الشخص المتلعثم [ يتضايق ويبتعد عنه ]

يتبعه صلاح [ يكرر ] :-

[ يبدو الزهق علي الشخص ]

والله لأفضل وراك كده لغايه ما يطلع دودك يا بومش إنتا

صلاح للشخص [ 2] :- وإنتوا ازاي اجمعتم هنا في الميدان

شخص [ 2 ] :- كلنا د خلنا علي الفيس بوك وشوفنا الميعاد

والمكان إنتا مدخلتش ولا ايه .

صلاح [ ساخرا ] :- هوا انا عارف اخـش دنيا لما اخش علي الفيس بوك

الحشاش [ ببلاهه ]:- هــوا ايــه الفــيـــز بـــوك ده

الفلاح :- دي ساعة كــــده بيشيلوا بيها الــــريس كل ما الشعب

يعوز يشيل ريس يخش علي الفيز بوك

صلاح [ ساخرا ] :- للحشاش

وإنتا بقي يا جناب الحشاش خارج في المظاهرات ليه

الحشاش :- ليه يعني جت عليا ولا ايه انا مواطن زي زيكو يا أخي عاوز الحريه

صلاح [ مستنكرا ] :- حريه ليه هي الثورة بيطلع فيها حشاشين كمان ايه ده

الحشاش :- ما هيا الداخليه اللي عملت فينا كده

صلاح :- ازاي يعني

الحشاش :- من ساعة ممنعوا الحشيش والشعب فاق مبقاش وراه حاجه

يعملها بقي يطلع مظاهرات

العجوز :- يا ابني اتقي الله ايه اللخبطه دي

الحشاش [ مستديرا للجميع ] :- اه والله وحياة المصحف هيا كده اه الدماغ باظت

شخص [ 1] :- طيب يا جماعه اللي هيموت منا في المظاهرات

هيطلع علي الجنة ولا النار

صلاح :- ان شاء الله هيطلع علي الجزيره

الفلاح [ مقاطعا ] :- يا جماعه خليكوا في المهم دلوقتي إنتم متأكدين

إن الريس هييجي لينا هنا في الميدان ويسمع مطالبنا

العجوز [ بثقه]:- طبعا لما إنتخبناه قالنا كده .

المرأة:- آه والله وحياتش إبني عمرو شمعته في التليفشيون

صلاح [ ناهـــــرا ] :- في المشمش يا أم عمرو

[ للجميع في إحباط ]

ياله يا جماعة روحوا.. ريس مين اللي ييجي ليكم هنا إنتم بالنسبة ليه دلوقتي

شوية صعاليك .. معطلين الدنيا .. وموقفين حال البلد .. مالكمش عنده ديه ..

اللي زيكوا يبوس إيديه وش وضهر .. إنه عايش بياكل ويشرب ..

إنتم فاكرين إن ليكو صوت .. إنتوا شويه نمل يعيش جوا الحجر

لو طلع منه يداس بالرجلين .. خليكوا جوا الحجر .. جوا الحجر [ مكررا ] ..

الحشاش مقاطعا :- إحترم نفسك يا جدع إنتا مالكش دعوه بالحجر

.. هتبوظ لنا المعسل .. هنعمل دماغ إزاي ..

صلاح [ بدفعه في سقوط ] :- أنا احترم نفسي ايه ده يا اخينا

إحترم نفسك إنتا إنتا مش عارف إنتا بتكلم مين .

شخص [ 1 ] :- هيكون بيكلم مين .

العجوز [ قلقا ] :- [ يهمس في إذنه ]

:- بس يا ابني ليطلع مخابرات ولا أمن دوله

المرأة:- يعني مقلتلناش إنتا بتشتغل إيه

صلاح [ في كبرياء ] :- أنا بشتغل صعلوك

الجميع [ بتعجب ] :- صعـلــوك

شخص [ 2 ] :- يعني ايه صعلوك هيا بقت شغلانه دي كمان وإحنا منعرفش

صلاح [ ينهره ] :- صعلوك يعني في حالي لا أنا عندي منصب

ولا عندي مطلب كل اللي عاوزه من الدنيا إنها تسيبني في حالي

العجوز :- وده يبقي حال يا بني . والحق . والعدل . والحريه

الجميع [ مندفعين نحو صلاح ] :- اللي زيك هما اللي رجعونا لورا .. إنت سلبي .

[ يقتربون منه مكررين [ يبتعد ] بهمهمات غضب يقترب الشاب الخنفس منه أكثر

صلاح [ يدفعه ] :- يا اخي إبعد الله .. علي الأقل أنا سلبي شوف إنت بقي نفسك ايه

الخنفس [ بدلال ] :- ما هما اللي بيزقوني .. الله . الله

صلاح [ مستنكرا ] :- لا وحياه ابوكم كفايه بقي فلسفه أنا مش عاجبكم بس عاجب نفسي .. سلبي . سلبي بس اعيش

[مبتعدين عنه ]

الطفل [ بنفور ] :- حتي القدوة بتاعتنا خلاص مبقاش ليها مكان لما الكبار يقولوا كده الصغيرين اللي زي يعملوا إيه .

صلاح [ ساخرا ] :- يشربوا اللبن ويناموا يا حماده بدل ما يروحوا

في داهيه هما واللي جابوهم

شخص [ 1 ] :- البلد بتضيع يا اخي وإنتا بتقول ماليش دعوه أمال مين اللي

يبنيها .. ويرفع الطوب فيها .. ويحط السقف .. اللي يضم كل عيله ..

صلاح [ ساخرا ] :- يا سلام بقه إنتم واقفين علشان الأسئلة دي كلها مالهاش

إجابه اللي يبنيها البنا .. والونش يرفع الطوب ..

والمقاول يحط السقف .

شخص [ 2 ] :- بطل يا جدع إنتا هزار .. البلد بتضيع ..

صلاح [ مقاطعا ] :- وأنا اعمل إيه يعني أجيب ميكرفون وأ قول

بلد تايهه يا ولاد الحلال .

العجوز :- يا إبني شارك معانا أقف زود حماسنا علشان نجيب حقوقنا

بعد أما الريس يرحل ..

صلاح [ بجديه ] :-

وإنتوا بقي ايه مطالبكم لما الريس يرحل

[ الجميع في صمت ]

صلاح [ مكررا ]

ايه مطالبكم مش عارفين عاوزين الريس يرحل وخلاص

وتولع الدنيا حددوا مطالبكم

شخص [ 1 ] :- أنا عاوزه يرحل بقي بقالي 20 يوم في الشارع

عاوز ارجع البيت استحمي ريحتي فاحت ريحتي فاحت

صلاح [ مبتعدا بتقزز ] :- أف الله يقرفك باين عليك باين .

[ مقتربا ] لشخص 2 :- وإنتا بقي عاوزه يرحل ليه

شخص 2 :- ياعم الولية عاوزة تولد والولد مش عايز يشوفه كفايه النحس

اللي احنا عايشين فيه فقر وجوع وعطش دي حتي ميه النيل

مبقتش تروينا يا جدع .

المتلعثم :- وأنا عاوزه يرحل بقي كف ايه ظل ظل ظلم

صلاح [ ساخرا ] :- خلاص يا حبيبي رحل .

المتلعثم [ مكررا ] :- انا عاوزه ي ي يرحل بقي كف ايه ظل ظلم

[ يضع صلاح يده علي فمه بحركه كوميديه مكررا [ خلاص الريس رحل ]

صلاح

[ وإنتا لأحد الأشخاص يبدوا انه يتناول بعض المخدرات ]:-

الحشاش :- والله مش عارف انا فتحت الفيز بوك لقيت ثورة

قولت اما شارك لأني بحب اخش في اي خناقة اه الجدعنه حلوة

الطفل :- يا جماعة ركزوا بقي شوفوا مطالبكم وياريت تقللوها علشان احنا

هندرس كل الكلام في المنهج كده هيبقي منهج التاريخ صعب قوي

صلاح [ ساخرا ] ياله بلاش كلام فارغ ايه الكلام ده قال ثورة قال

ياله كل واحد يروح بيته وإنتا يا إبني روح علي مدرستك

شخص [ 1 ] :- الثورة مستمره ومش هنمشي الا ما هو يا يمشي

شخص [ 2 ] :- الثوره قايمة لسه صاحيه منمتش ..

الثورة مانمتش … مانمتش

[ يسمع صوت شخير عالي :- أأأأأأأأأأأأخخخخخخخخخ

[ صادرا من الحشاش مستلقيا علي الرصيف ]

صلاح [ ساخرا ] :- الثورة نامت وشخرت يا خويا

يحاول أحدهم إفاقته [ يقوم فزعا إيه يا جماعة البوليس كبس ولا ايه ]

العجوز :- يا إبني زي ما أنتا شايف كل أطياف الشعب خارجه المثقف والجاهل

كلهم خارجين عشان الحق والعدل ..

صلاح [ يتفحصهم علي التوالي ] :-

المثقف – العامل – الفلاح – ست البيت حتي الأطفال

[ ينظر ساخرا إلي الشاب الخنفس ] طيب دول وعرفناهم

أمال ده يبقي إيه بقي جنس تالت يا والدي ولا إيه .

الخنفس [ بحده ] :- إخرس أنتا فاكر نفسك مين

الحشاش [ مشجعا ] :- أيوه كده يا عم دي عالم تخاف متختشيش إديله في جنابه

الخنفس [ مكررا ] :- إخرس يا جدع إنتا .. إخرس [ بحدة ]

الفلاح :- بس يا حبيبي ليطق لك عرق النسا وإنت مش ناقص

صلاح [ مكررا ] :- ياله كل واحد يروح علي بيته بلاش كلام فارغ

[ ضجيج وإمتعاض لكلامات صلاح متجهين نحوه ثائرين :-

بس إسكت إنتا كلام فارغ مين روح إنت ..

[ مكررين ]

يقطع الضجيج دخول مسئول بسيارة [ يمكن التعبير عنها بصوت سيارة الأمن ]

يسكت الجميع يدخل مسئول كبير بنظارة سوداء وحوله حراسة ضخمه

الجميع [ مكبرين الله اكبر الله اكبر الله اكبر :- الريس جه الريس جه ]

يقترب منه الشخص الحشاش [ بنظراته البلهاء ] :-

ايوه يا عم شكلك زي اللي في التليفزيون

المسئول [ للجميع ] :- خير ايه الفوضي الخلاقة اللي انتوا عا ملينها في البلد دي

مظاهرات وقطع طرق ورمي حجارة

الحشاش [ مقاطعا ] :- لأ وحياة ابوك بلاش رمي الحجارة حرام عليك المعسل غلي

الأمن [ يدفعه بعيدا ] :- بس يا جدع إنتا

المسئول :- في ايه يا جماعة واقفين الدنيا بقالكم شهر ليه

الجميع :- الشعب يطالب بالرحيل

المسئول :- يا سلام بس كده أوكيه اللي عاوز يرحل يرحل ؟ حد مسكه ؟

العجوز [ بحكمه ] :- يا سيادة الريس .

المسئول :- أنا مش سيادة الريس يا والدي انا مسئول كبير بعتني

سيا دته علشان اشوف مطالبكم وأبلغ سيادته بيها .

المتلعثم :- وسيادتك هتبلغ الريس بمطالبنا [ بتلعثم ]

المسئول [ مستمعا في ضيق ] :- مش فاهم

المتلعثم [ مكررا ]

المسئول [ مصطنعا الفكاهه ] :- عروستي

[ ينظر لصلاح ]

– هوا الجدع ده بيقول إيه أصل انا ضعيف في الهند ي

صلاح :- بيقول يا فندم سيادة الريس هينفذ مطالبنا .

شخص 1 :- يعني لو قلنا طلباتنا هتسمعوا كلامنا

المسئول :- طبعا طبعا سيادته ديمقراطي اكتبوا طلباتكم في ورق علشان

سيادته يطلع عليها .. ياله .. داإنتم هتنبسطوا قوي .

الجميع [ بصوت واحد ] :- كل طلباتنا مكتوبه هاتوها يا رجاله

[ يلتفت الفلاح إلي الخلف ومعه الشخص رقم [ 1 ] بإستداره بسيطه

ثم عوده للأمام يحملان كل منهما جوال كبير ]

يضعا ها امام المسئول

المسئول :- ايه كل ده الريس هيقرا كل ده سعادته مش فاضي

يا ريت تعملوها علي فلاشة او سي دي كمبيوتر ..

صلاح [ متعجبا ] :- يا سلام ما نعملها مسلسل احسن من اجزاء

عشان سيادته يتسلي

المسئول :- انتا يا جدع انتا احنا عاوزين طلبات معقوله

وبعدين انتا مين انتا علشان تتكلم بلسان الشعب .

[ للجميع ] إنتم فوضتوه يكلم بلسانكم

[يقترب الجميع من بعضهم البعض ملتفين في إتفاق ]

شخص [ 1 ] :- ايه رأيكم يا جماعة نخليه هوا اللي يكلم بلسانا ..

شخــــص [ 2 ] :- لأ وإشمعـــنا هوا مينفعش أنا ولا إيه .

الفلاح :- إسكت يا عبيط بالعكس دي هوا ده المطلوب

علشان لو راح في داهيه ميتبكيش عليه .

المراة :- ياله خليه يشربها .. باين عليه لمض ولسانه متبري منه .

يقترب شخص [1 ] :- من صلاح

[ يمسك كتفه بجديه ] شوف يا صلاح

صلاح [ بإهتمام ] :- ايوه اشوف ايه

الشخص [ انتا اللي هتغني يا منعم ]

صلاح [ بنفور ] يا ه عليكم يا جماعة عاوزين ايه

الشخص 1 :- احنا فوضناك انتا اللي تجيب لينا حقنا

الحشاش :- اه والمشاريب عليك

المسئول [ يزفر في ضيق ] :- خلصونا بقه مين فيكم هييجي معانا

علشان نتفاوض معاه .

الجميع [ مشيرين الي صلاح ] :- أ هوا هوا ده اللي هييجي معاك

صلاح [ في رفض ] :- نعم اجي فين معاكو هو اللي بيروح معاكو بيرجع

المسئول [ بثقه ]:- ما نتا مجربتش قبل كده دا انتا هترجع بسرعه

هيا ثانيه واحده وهـــتــرجع لأهلك

صلاح [ ممتنعا ] :- لأ يا جماعه شوفوا حد تاني .

[ يتجه إليهم يستديرون للخلف بينما يستدير الخنفس بميوعه ]

صلاح :- خلاص كلكم خلعتو وورطتوني أمال فين الوطنيه والثوريه

وقت الجد بتدوني …….. [ ينظر لمؤخره الخنفس ] ولا بلاش عيب ..

صلاح :- أمري لله [ يعتدل الجميع ] ويهللوا : الله أكبر

المسئول ياله يا جماعه خدوه [ يخرج المسئول ] ومعه الحراسه وصلاح من الباب الأيمن للمسرح .

موسيقي هادئة يزامن إلتفاف الجميع يرفعون لافتات مكتوب عليها ارحل ارحل إرحل

[ إظلام مع إضاءة خلفيه لشاشة العرض ]

أخبار عاجله قديمة عن ثورات الدول العربيه

– تزامن ضوئي .. ليل ونهار ..

– مشاهد للثوار نائمين

– إظلام مع بقع ضوئيه

[ قطع العرض ] مع إضاءة المسرح

شخص [ 1 ] :- بقالنا اسبوع والجدع ده لا حس ولا خبر

العجوز :- الغايب حجته معاه يا ا بني

الفلاح :- ايوه يا ابه بس ده باين عليه جدع خاين وبعنا

شخص [ 2 ] :- إزاي يبعنا وإحنا إخترناه ممثل لجميع القوي الثوريه

المرأة :- يا جماعه يمكن هرب

الخنفس :- ولا يمكن بوليس الآداب مسكه

[ يسمع صوت رسالة في تليفون المحمول الخاص بالحشاش يلتفت الجميع في صوت تليفون يا جماعه ]

الحشاش :- [ يخرجه من جيبه ويتفحصه ] :- آه عندي أنا

الفلاح :- أما عجيبه يا جدع انتا كل تليفوناتنا فاصلة شحن وتليفونك إنتا اللي شغال

الحشاش :- أصله صاحب مزاج زي صاحبه

العجوز :- طيب يا إبني أقراها يمكن في حاجه مهمه حصلت

الفلاح [ منتزعا المحمول ] :- يا عم هات كده لما نشوف في إيه إنتا هتقعد تبص

[ يحملق بإهتمام ] يا خبر أبيض .. يا نهار . يااااااااه

الجميع [ في إهتمام وذهول ] :- خير في ايه .. إيه اللي حصل

الفلاح :- مبعرفش أقــــــرا

العجوز [ لشخص رقم 1 ] :- خد يا إبني أقراها شوف في ايه

الطفل :- هات أما أقراها أنا واشف في ايه [ ينظر سريعا]

– خبر مش حلو تفجير خط أنابيب الغاز الطبيعي في العـــريش

كده يبقي الثورة هتفشل

العجوز :- ربنا يستر يا ابني بس احنا مالنا احنا ثورتنا نظيفه مالهاش

علاقة بالناس دول دول مخربين ومندسين ..

المرأة :- يا جماعة طب والمخفي علي عينه ده اللي اسمه صلاح فينه

الطفل :- أنا تعبت بقي م الوقفه مش هو راح يجيب الحل وييجي

الفلاح :- الغايب حجته معاه يا ابني

الطفل :- أصل أنا يا عمو لو غبت عن المدرسه أكتر من كده هترفض

الخنفس :- وأنا كمان عندي مشكله كبيره

الفلاح [ ساخرا ] :- إيه يعني ولا مؤاخذه شعر صدرك إتأخر في الطلوع ولا إيه .

الخنفس [ ينهره ] :- يا جماعه شوفوا لكم حل عندي مشكله

شخص [ 1 ] :- مشكله ايه يا اخي كلنا سايبين مصالحنا وحالنا

علشان الوطن إنتا إيه مشكلتك

الخنفس :- إشتراك الجيم والساونا بالبخار بتاعي قرب يخلص ولازم أجدده

الفلاح :- يا سلام بقه إنتا مشكلتك كده

[ يقترب منه الجميع ناهرين في صوت واحد ايه الدلع ده ] [ صمت تام يبتعد الجميع في ذهول]

عند دخول صلاح ممزق الملابس مدمي في أجزاء كثيره من جسده

[ يصاحبه موسيقي حزينه ]

صلاح [ للجميع ] :- مالكم يا جماعة معلش إتااخرت

[ يلمس قفاه ] أصل الإجتماع طول شويه

شخص [ 1 ] :- إيه اللي حصل

صلاح [ بإغتراب ] والله اللي مبيشوفش من الغربان يبقي اعمي يا خويا

الحشاش :- ايه يا عم ده هما لقوا معاك حاجة ولا ايه

صلاح :- آه طبعا لقوا معاي حب الوطن .. لقوا معاي قلب نظيف لسه متلوثش زي غيري .. لقوا معاي مطالب ناس غلابه .. كل أملها وحلمها إنهم يعيشوا زي البني آدميين .. ياكلوا ويشربوا بس و يلاقوا نومه تتا ويهم .. شفت لقوا معاي ايه لقوا كل التهم دي .. مش تبقي دي مصيبة وكارثة .. قولوا لي مش تبقي نصيبة وكارثة .

الحشاش :- علي النعمه ما أنا فاهم حاجه م الجدع ده .

العجوز :- يا بني قول لنا ايه اللي حصل لك

المرأة :- ما تقول يا خويا

صلاح :- أبدا محصلش حاجة إحنا غلطنا يا جماعه عيب والله لازم نعقل ونقلب اليافته

الجميع [ يعني هنهتف نقول ايه ]

صلاح [ يمر أمامهم جميعا يقلب اليافتات علي الأرض واحده تلو الأخري ]

ينظر لليافته ويقول :- هنقو ل كده معلش يا ريش شعبك بنهزر معاك

[ يكرر ] ويقول لهم :- ساكتين ليه قولوا [ يكرر ] متجها نحو الباب

يهتف معه الجميع [معلش يا ريش شعبك بيهزر معاك ] معلش يا ريش شعبك بيهزر معاك معلش يا ريش شعبك بنهزر معاك يتجه الجميع نحو الباب [ خروج ]

صوت المذيع

بيان هام من رئاسة الجمهوريه

أعلنت رئاسة الجمهورية عن شكرها العميق لخروج الجماهير الغفيرة المحبة لسايدة الرئيس في الميدان وناشدتهم العودة لبيوتهم بعد أن ظلوا رافعين شعار المحبة أكثر من 20 يوما ويهديهم السيد الرئيس أغنيته المفضلة للشعب [ موسيقي ساخره للموقف ]

وعبر أثير الاذاعة يهدي الشعب أغنية نانسي عجرم .. ‘اخا صمك اه .. اسيبك لأ.'”

 

 

 

 

[ قطع ]