الفجر كداب والنهار مهزوم فى حضنى والليل كما غول وطايح واحنا ارتضينا بالمذله ورمحنا ورا وهم وسراب معجون بكذب وهرطقه قلنا العرب اصل الشهامه والكرم رغم ان اكبرنا جبان مش محترم وانا مستاهلشى ف يوم اكون ابن الهرم ولا مره استاهل اطوف جوه الحرم ….. متربيين ع السفسطه يسقونا كدب وذندقه من اول السلاطين لاخر السلاطين الخطبه محفوظه والكلمه مهزوزه شد الحزام واربط على بطنك وكلام كتير مالهوش معانى افتح عيونك صحصح ف حلمك الغدر ماشى بيستخبى جوه كمك احرق بحور النفط فى بطن الاراضى تحبل ويكبر ولدها دخان كرامه …… بتبكى ليه على سوريا ومتشحتف على غزه وبتدحرج ف كام دمعه على خدك عامل نفسك حزين مهموم وم الفجريه على ( لندن ) ومنها تفوت على ( بازل ) ولابس وشك العازل بتتكور ف قعر الكاس وتطوح ف وسط الناس ولما تفوق تروح طالع على ( تكساس ) بتعمل م الفلوس اكوام وتخسرهم على النسوان وناسى دم اولادك على الطرقات ف كل مكان وعايش خارج المشهد وضايعه منك الازمان فى فجر كداب وليل كما غول وطايح بتنسى قيمة الانسان
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
