الاسم : د . أحمد رجب النمر
العنوان : قويسنا ـ المنوفية ـ مصر
ت : 01069678128
الفئه : القصيده العاميه
ياللا نلعب
ياللا تعالى علشان نلعب
لعبة جميلة فيها المكسب
يمكن نشقى و يمكن نتعب
بس أكيد أخرتها هنكسب
و ياللا تعالى علشان نلعب
ياللا تعالى نلعب صلَّح
صلَّح بيتك صلَّح أرضك
صلَّح عقلك صلَّح وطنك
صلَّح صلَّح كله بشغلك
صلَّح و انت اكيد راح تكسب
و ابقى تعالى علشان نلعب
ياللا تعالى نلعب بوكس
بوكس لخاين راح يهدمنا
بوكس لفاسد راح يفرمنا
بوكس لأى عميل أو ظالم
نديله بوكس خليه يهرب
و ابقى تعالى علشان نلعب
ياللا تعالى نشوط ف الجون
نشوط اليأس فوق العارضة
و نطلعه برة حياتنا
نعمل فاول ضد الخيبة
نستبدلها بأمنياتنا
نطرد أى نفوس هدَّامة
تقتل فينا طموح أولادنا
خلِّى هدفنا اسم بلدنا
و احنا ساعتها أكيد راح نكسب
و ابقى تعالى علشان نلعب
ياللا تعالى نلعب دومينا
رص الطوبة جنب الطوبة
علشان نبنى تانى بلدنا
اعمل قفلة ف وش عدوك
خليه يبعد عن أولادنا
و هات الدش … نحمِّى ضميرنا
و نعيد تانى بناء أمجادنا
ركز جامد علشان نكسب
و ابقى تعالى علشان نلعب
