كنت رايح بيت أبويا لأجل ما أودع حيطانه
لأجل أعيش الذكريات لأجل ما أفتح بيبانه
الجرس نادى على قلت أشيله من مكانه
آخده عندى جوه بيتى يرجع الحق وميزانه
الحيطان قالت تعالى جوه حضنى إستخبى
البيبان زعلت وقالت متى قرب جنبى حبه
البلاط م الشوق بيصرخ كل خطوة كل دبه
الدولاب ينده على ليه وفين راحوا الأحبه
عالسفرة وقمت قاعد أتخيل أكلى معاهم
وألا لمتنا ف جمعه وقت ما أحضر عشاهم
وقت ماأتسحب لأمى والطبيخ ساعة غداهم
أكشف الحلة وأعلق كبده قنصه من وراهم
أمى عارفه إنى الحرامى ولما يسألوها فين
تقولهم ماكانش فيها تبص وبشوق وبحنين
حطاهم ف الحله بيدى بس واحده ليه تنين
إبقى سيب واحده حبيبى تخزى بيها بس عين
كنت بأصرخ م الآلام ذكريات تدمى القلوب
والدموع جفت خلاص والعيون قلبت لطوب
نفسى يابا تانى أشوفك نفسى ياأمه فيكى أدوب
نفسى أنام وأحلم كمان قلبى مليان بالخطوب
السرير نايم قبالى والمخدات والمراتب
نازلة دمعه منى سالت بيها كان الخد كاتب
م الكتابة العقل تايه برضه كان القلب دايب
القصة من غير نهايه قصتى لأغلى الحبايب
ف الصالون شفت الضيوف وسطهم أبويا قاعد
رحت داخل بالصينية للضيوف أقدم وأساعد
ياللا سلم بوس لعمك واللى جنبه إوعاك تباعد
دول قرايبك غبقى زورهم للحبايب مد ساعد
للبرانده عينى راحت سهره كانت تحلا فيها
نازلة دامعه منى تجرى ليه مخبى ليه مداريها
الدموع من العين دى رحمه للقلوب تعلن مابيها
دنيا ليها ماعدش معنى دنيا بايع مش شاريها
لسه نازل عالسلالم دمعى ماسح حزنى كاتم
قابلنى سلم على قاللى فينك قلت حازم
قال سلامتك إنت فينك عالبعاد أنا قلبى نادم
قلت ليه تعتب على حزنى منى قلبى قاسم
لو تعرف إيه اللى بى كنت هتحاول تجينى
يوم ماراحت منى أمى قلت روحى نن عينى
مافى حد غيرها يقدر ويحرك حزنى وسنينى
بعدها حصلها أبويا حقيقى منى قطع وتينى
واللى صبرنى حقيقى إنى متمسك بدينى
ربى يجمعنى معاهم ربى ويصبر حنينى
لسه نازل جه عصام ليه سياسة وليه خصام
ليه تخالف رأى ربك ليه توافق عالحرام قوم
وعدل قوم وصلح قوم وغير فى الكلام لأجل
مانفضل حبايب لأجل يحصل الإنسجام
بسطة تانية شفت ياسر جى طالع قلبى كاسر
العيال ضحكت علينا إوعى أخوك تبقى خاسر
شقة شاقة منى عمرى قاللى قرب قلت حاضر
خدنى بالأحضان ودوبنا حبيبى والله أكيد ياياسر
جاية أختى تحت تجرى ليه تفرط لسه بدرى
سبتهم ياخدوها ليه كله فيها كان وحصرى
ذكرياتنا ف الطفولة ليه وراحت فين يامصرى
ناسى لما كنا نلعب نستخبى فيها نجرى
جى محمد م الكويت جى وفاكر ده هزار
وإنى مش ممكن راح أقبل أو أنفذ للقرار
شقة دى تمليك ياخلق ماهى شقة للإيجار
لو قرارنا لابد منه للبديل يبقى إنتظار
شافنى أحمد كنت نازل قاللى راحة ليه المنازل
ليه وتمضى ليه وترضى ليه توافق عالتنازل
إنت لو فتحت مخك كنت للمسؤول تغازل كان
اكيد عالعقد يمضى مش هيبقى بينكوا عازل
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
