الاسم / محمود عبد الصمد زكريا
مصر – الاسكندرية
ت: 01222997872
[email protected]
قصيدة تفعيلية عامية عنوانها ( الموت ميكسبش الرهان )
الموت ..
ميكسبش الرهان
……………………………….
يا اللا افردي قوس الجناح
وامشي علي الأوتار
وغني من جديد
غنوه ربيع
الموت ميكسبش الرهان
* * * *
نصك فرح
والنص مشتاق للمطر
ح ارميله غيمة في بنطلون
عنقود ملاعبه
وح اعصره فوق الزبيب
وانا جاي
وماشي فوق أزاز العشق
وف دمي الحليب …
يمكن مناخي يكون قديم
لكني متأكد قوي
إنه ح يمسخ
أي طقس يكون جديد .
* * * *
يا حبيبتي كنتي انتي
وكانت ميّتك
وكتاب ليليت ..
والحب شمعه منوّره
علي مدخل القلب الحزين
وانا كنت ناعم
زى حلم يحققه ..
وباصب في دورق ضلوعك
كاس ..
وأقولك ده الكتاب
بالحب ؛ والقوة اكتبيه
وعنيكي كانت ليل
معلّق فوق كتافه نجمتين
وعذاب حنين
كان السكوت
بيعري دم الشوق
ويكتب كلمتين..
كان نفسهم يتوصّلو في جمله
عشان جغرافية الوضع الجديد
تكمل ملامحها؛ وتلبس
توب حرير.
* * * *
وانا كنت طقس ميتنسيش
من غيره صوتك تل رمله
والطريق ..
مرسومه من دم القصايد
والتاريخ ..
أشجار دموع ..
* * * *
السقا عدي
وللأسف مفهمتهوش
السقا عدي
بقربته وممسكتهوش
ساب لك يا دوب دورق
ميغسلش الهموم ..
ودولاب همومك
لسه فيه فساتين كتير..
والتلج قاعد ف السما
مستني فرصه للهجوم
حتى اسألي الكنبة
وكرسي الأنتريه
ح يقولوا كان قاعد هنا
وضلوعه جسر من الحنين
ومعبي شوق كل السنين
هربان من الليل ؛
والأنين
كان ناوي يملالك
دوارق مهجتك
ويعلّمك ….
الحب مش طباشير علي السبورة
ممكن يتمسح
كان حبه لسه بيتولد
نازل ببرنس من دهب
شفاف
ورجليه مغسولين
ح يقولوا كان
ويا ريت يعود
علشان تقومي ؛
وتفردي قوس الجناح
وتغني غنوه للمطر:
الموت ميكسنش الرهان .
