الشعر العامى
الناس الغلابه
معنى الرضا واضح اوى على وشوش الغلابه
واضح على راجل عجوز بيبيع امل لفه ف طيابه
قاعد وجنبه قطته رفضت تعيش وسط الديابه
بيته الرصيف
والشمس بتعاكس عنيه
ماسك رغيف
جواه فراغ سده بايده
بس الغرابه
نفس الرغيف بتاكل منه قطته
رحمه غريبه من عجوز على فطرته
وشه بيضحك رغم ضهره اللى اتحنى من شيل همومه
راضى ببيعته اللى يادوب بتجيبلوا رزق اليوم بيومه
تحويشه عمره سنه واخدها زكرى من الزمان
عايشه وحيده زيه بعد فراق باقى السنان
والقطه برضو وحيده زيهم
راضيين اوى وحامدين ربهم
لو الف كلمه صعب توصف البساطه
فوقوا بقى يا اللى عايشنها بقلاطه
عايز تعيش معنى الرضا
ركز فى ناس عايشين كده
قرب من الناس الغلابه
