انا .. والبحر
…………….عونى هشام
==============
يا بحر ايه اسرارك
قول لى خبيت ايه
الكل مشغول بيك
سرك مخبيه ليه
مرة تكون هايج
ومرة الامان تعطيه
الغدر مكنون فيك
والطيبة باينه عليه
فيك اللى راح جواك
مطلعش من اراضيك
عليك المراكب عايمة
وبتلف كتير حواليك
جواك نشوف الخير
وبيرزق كتير منك
فيك اللآلئ درر
ولا نعرف كتير عنك
شايل هموم البشر
لا سألت مين ده وليه
شبهت نفسى بيك
وعرفت فيك معانيه
انت اللى دايما تعطى
ولا تسأل بتعطى لمين
لا مرة سألت سؤال
ولا سرك عرفناه فين
فيك الكلام ما انتهى
والشعر مكتوب ليك
ع الشط نسهر سوى
والبدر غاطس فيك
وانا وحبيب الهوى
والنسمة مرة عليك
اسرح في دنيا الغرام
والفضل يرجع ليك
سكون هدوء في الكون
والسر من جواك
ربى اللى عالم بيك
وبناجى ربى معاك
يا بحر خدنى صديق
الناس ما فيها امان
صحيح الغدر فيك
لكن ارحم من الانسان
