ط
الشعر والأدب

انت غير كل البشر (شعر ناديه لطفى)

اصل انت غير كل البشر
القلب ده نبضه فى عروق
من زمن
مولوده بيه
وانا من بداية العمر
عشت اتهجى فيه
شوقى يناديه
بيك الشجر
فجأه أتامر
يطرح زهور متبسمه
فى عز الخريف
عمره ما خاف
لحظه فى حضنك يوم يضيع
لساه رضيع
محتاج اوى
لضمة الروح للجسد
شلال دفا جوا العيون الطيبه
وأدين ساكنها
عشق الحنين والطبطبه
وقلوب أساسها مخلصه
الصمت
كلها من سنين
رغم إنها مولوده
جوا بحور كلام
راضعه الغرام
لكن هواها مشنقه
الصدق بيدوب جميع الاقنعه
بس انت غير كل البشر

انت الهوا جوا الصدور
الضيقه
انت بصيص
ضوء القمر
فى عتمة الليل الطويل
انت الاسير
زنزانة القلب العليل
انت الجوى
وانت الدوا
عنقود حياه
ربط المحبه بالنوى
انت اللى ليك
كل الحقايق تتجلى
أصل انت غير كل البشر
انت اللى منك
كنت انا
وانت اللى بيك
برضه انا
وانت اللى ليك
هو انا
موجوعه بيك
عاشقه معاك حتى الالم
رافضه الندم
بعدى عدم
وحطام ..صنم
جوه القصور المبهمه
وخيوط حرير
مغزوله جوه الشرنقه
بتضيق قوى
تخنق ازاهير الهوى
أجرى وانزف ع الورق
جبال حصى
واتوضى من طهر الحوار ..
اللى ابتدى
يرسم دواير فى الخطر
بس انت غير كل البشر
بس انت غير كل البشر

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى