بدرت قلبي .. مسابقة العامية بقلم / د. محسن زكريا عثمان شرقاوى من مصر

د. محسن زكريا عثمان شرقاوى
أسم الشهرة : د. محسن الشرقاوى
الزقازيق 01225291602
مسابقة شعر العامية
بدرت قلبي ..!!

بدرت قلبي ف الغيطان .. حبات محبة
وقلت يمكن ف الأوان .. تطلع أحبة
تطلع ورود .. تطلع عهود ..
تطلع قلوب .. من غير قيود ..
تطلع شجر .. ضلة لبشر ..
تطلع قمر .. ف ليل خطر ..
تطلع أمال .. لولاد حلال ..
وقعدت أحلم .. بالجمال ..!!
بدرت قلبي .. !!
***
وف يوم مضلم .. من غير ما أحس ..
لقيت أيدين بتحش قلبي م الجدور
من غير شعور .. بتطفي نور ..
تقطع شجر وتدوس بقسوة ع الزهور
قلت : ياشمس .. قالولي هس ..
ممنوع تنادي .. لو حتي همس ..
قلت : يا ناس .. ما لقتش حد ..
فاضي لحد .. ولا بيحس ..!!
بدرت قلبي .. !!
***
لملمت قلبي .. وبقايا وردي ..
وقلت أعدي علي بر تاني ..
برغم جرحي .. وليل معدي ..
لسه ف قلبي .. بعض الأماني ..
وبأداوي همي .. وأسند ف عودي ..
لسه بأدندن .. وبأقول أغاني ..!!
بدرت قلبي .. !!
***
مادام ف قلبك لسه حياة ..
مادام ف عمرك لسه زمان ..
تقدر يا قلبي تبدر كمان ..
ف أي حتة حب وحنان ..
تطلع ورود .. تطلع عهود ..
تطلع قلوب .. من غير قيود ..
تطلع أمال .. لولاد حلال ..
أنا دايماَ أحلم بالجمال ..
وبدرت قلبي .. !!
د. محسن الشرقاوى