خاص بمسابقة همسة
الشعر العامى
فهمى ريان . مصر . الشرقيه
بسم الذى القى فى قلبى الاشتياق
بسم الذى نادى فلبيت النداء
ووهبلى قلب كبير اتاه حنيته
وكتبله عمر يعيشه فاقد الاحتواء
القيت سلامى للنخيل والنيل
اهديت محبة للقلق والخوف
طمنت قلبك ان طبعى اصيل
وزرعت ارضك ورد مد الشوف
قدمت وعدى لو تميلى اميل
واحج بيتك واسعى ليكى واطوف
وان رد عينك كان لعينى قليل
هاستحملك واصبر عليكى واشوف
لو فين بلادك هامشى مليون ميل
واغزل عشانك منديلين من صوف
امسح دموعك لو فى يوم هتسيل
واكتب كتابك وامحى اى كسوف
وفى كحل ليلك هتلاقينى دليل
وفى عز شمسك ضلك المكشوف
مشوار بدأته بجد مش تمثيل
ولقيت فى قربك م الضحايا الوف
هاصبر عشانك كل صبر جميل
ولا يوم هاسيبك تحت اى ظروف
هاغسل وريدك م الضنا والويل
مستنى بس تردى بالمعروف
يارب هب لى من لدنك الاحتواء
واجعل لى فيها م الوجع ليا الشفاء
وان يوم كتبت عليا شيئا من وجع
يارب اشفى الداء وخليها الدواء
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
