رغم مرور 3 سنوات على زواجهما، إلا أنه قرر أن يكافئ زوجته ويقيم لها حفل زفاف كاملاً، ليعوضها عن زواجهما دون إقامة حفل.
محمد سعيد، الشهير بـ«جبس مصر»، 26 عاماً، يوتيوبر مصرى، حاول أن يرسم السعادة على وجه زوجته ويحتفل بزواجهما عن طريق إقامة حفل كبير ويكون ابنه أول المدعوين: «عندى قناة على يوتيوب باقدم فيها محتوى ترفيهى، كنت واعد مراتى أن أول ما ربنا يرزقنى بفلوس هاعمل لها فرح كبير، ولما ربنا كرمنى، نفّذت وعدى ليها».
يروى «سعيد» أنه منذ بداية طرحه الفكرة وتباينت المشاعر حولها بين الفرحة والاستغراب: «فيه كتير كانوا فاكرينى باعمل مقلب فى مراتى، كله كان مستغرب إنى هاعمل فرح وابنى معايا فى الكوشة، أبويا ماكانش مصدق أصلاً، كان فاكرنى باهزر وماحضرش الفرح».
وحسب «سعيد»، فإن حفل الزفاف كلفه الكثير من الأموال: «الموضوع كان مكلف، كوافير، وتسجيل أغنية، وفستان جديد، كنت مصمم إنى أجيب ليا ولابنى نفس البدلة، ده غير حجز القاعة، ودعوات المعازيم، بس ده كله فى النهاية مايساويش عندى حاجة جنب فرحة مراتى أم سليم».
«ابنى طول الفرح كان مبسوط، ماعيطش خالص»، كلمات «سعيد» بنبرة تملأها السعادة: «كنت مستغرب، لأنه فى العادى مش بيبطل عياط، بس هو كان مبسوط، رغم سنه الصغيرة، بس هو مش هينسى اليوم أكيد، المشاهد اتحفرت فى ذاكرته، هيفتكر إنه أول طفل يحضر فرح أبوه وأمه».
ويتذكر أن حفل زفافه الأول لم يكمل 45 دقيقة: «ماكانش حلو خالص، مافرحناش، كان حاجة على الضيق جداً»، فوفقاً لقوله: «اتجوزنا واحنا صغيرين، عيد ميلادنا فى نفس اليوم، وكان أبسط حاجة أعبّر من خلالها عن حبى لزوجتى هو الفرح»
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
