بحبك عشوائيه
وماشيه مبهدله
وغاويه فانطظيه
وساعات مسترجله
واحبك وانتى رافضه
تجاوبى الأسئله
واحبك أحلى ضحكه
جميله . مجلجله
وبسرح ويا نيلك
تاخدنى الذكريات
وراضى انا بقليلك
وبتنرفز ساعات
ومهما ابعد بجيلك
وبرغم المسافات
ولو تعبانه أشيلك
يا مهد الحضارات
ضميرك دا ضميرى
وقلبك سلسبيل
وحُضنك شئ ضرورى
ولا لغيرك بميل
واشِب عشان تطولى
واكون لك كالنخيل
ولو زهقانه قولى
أغنيلك . ياليل
بحبك زرع أخضر
واحبك صوت مصانع
واحبك رمل أصفر
ما شعاع الفجر طالع
واحبك أد ما اقدر
بحواريكى وشوارع
وصوت الله أكبر
ف كنيسه وكل جامع
بحبك زى ما انتى
يا نكسه وإنتصار
واحبك يا حبيبتى
خرابه أو عمار
ولو فى يوم سألتى
أنا ليه مش م الكُبار
راح أقولك سر . لكن
أرجوكى ما تزعليش
دلعك يا غاليه فينا
دا سبب الإنكسار
دا
سبب
الإنكسار
وبـــــحـــبــــك
كلمات \ أحمد شاهين
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
