ط
مسابقة الشعر

بــفتح الألبوم قابلتك ..خاص بمسابقة العامية بقلم/ غادة ابراهيم من مصر

قصيدة / بــفتح الألبوم قابلتك .. بــ قلمي / غادة إبراهيم 
(خاص بالمسابقه )

___________________________________

بفتح الألبوم قابلتك …!!

صوره بـ تجمَّع ما بينا !!

كنت فيها جوا حضنك …

وانت كنت شايلني فيها

وابتسامتك كات تالتنا !!

صوره تانيه كات كفوفك ماسكه كفي ..
جوه لوحه لونها ابيض

شايله روح خيالاتنا فيها لشكل بيتنا !!

ابتسمت .. ضحكت جداااااااااااااً

صرخه خانت كل صمتي …

فَجر بــــ الأوجاع بـــ يدن !!

يااااااااه يا صاحب عمري وللا يا كل عمري
وللا قوللي ممكن ابقى اناديك بـ إيه ؟!!

نفسي ألمس تاني كفك

نفسي اشوفك ، نفسي احسك !!

نفسي حاجز بينا يدبل !!

نفسي اسأل حد عنك … نفسي أطمن عليك !!

مانتَ واحش قلبي جداً

روح براءتك لما تضحك

شكل وشك لما تحزن !

لون دموعك ، كل شئ !!

يااااه يا صاحب عمري وللا يا كل عمري
نفسي بعدك انهي عمري
حسه فيا بـ ألف ضيييييييييق !

رد مـ الصوره وحاوطني

مد ايدك خدني جمبك …

ياااااه وحشني انام فـ حضنك وافضل ابكي

لأ مش ابكي

عاوزه اصرخ …
عاوزه أفضفض كل وجعي

عاوزه ابكي وعاوزه أحكي وعاوزه أشكي

عاوزه اخدني فــ حضني برضه !!

عاوزه اقوللي ماتخافيش !!

عاوزه اطمن قلبي برضه

نفسي اقوله انك بــ خير !!

قلت مره وألف مره .. قاللي لأه ماتكدبيش !!

كل شئ فـ الدنيا ديا فيه حاجات مربوطه بيك !!

حتى شََعري

و..فــ ضفايري شعور بـ يستغرب إديا و فجأه يسأل عن اديك !!

كل شئ جوايا ليك !!

حتى ضحكي ..

حتى فعلا لما بضحك ضحكه صادقه بـ كل قلبي

فجأه ببكي … وقلبي فجأه بـ يبقى شايفك !!

بفتكر ضحكة شفايفك !!

لما ابكي وفجأه تبدأ تحكي حاجه اي حاجه لجل اضحك !!

كنت ياااااااااااه من قلب بفرح

كنت يااااااااااه من قلبي بضحك

من حنانك ،، من شقاوتك

من براءتك ، من طريقتك !!

من جمالك لما تضحك !!

كنت اداري الضحكه حبه ،

كنت تيجي تقوللي عارفِك

مش هتيجي إلا اما امد إديا فعلاً بين خدودك
و بإديا افرد شفايفك !

كنت بضحك غصب عني !!

وارمي نفسي جوه حضنك !!

يااااااااااه يا حزني ويااااه حزنك …. !!

كل شئ وياك وحشني

الشوارع !!

الجناين !!

تحت مطره ف صبح بارد

ويا طعم النسكافيه !!

حتى برضه تعليقاتك عـ الوشوش والناس بحالها

وكل شئ نضحك عليه !!

برضه بشتاق تقليداتك ، لما تشركني فـ حياتك

وتحكي من لحظة ما سبتك ، لحد تاني ماتقابلنا

وكل شئ شفته بـ عيونك كنت مش وياك ووحدك عشت فيه !!

،،

فاكره شكلك .. فاكره وصفك عم سامح اللي على اول شارعكم !!

فاكره تقليدك ملامحه لما يجي يدق بيتكم !!

فاكره برضه الست شاديه ..

اللي كانت بـ تقابلنا ببـ تبتسم بسمه بـ ضمير

كنا نمشي خطوه واحده .. تفضل انت تحكي عنها

كنت بضحك ضحكه عاليه لما تيجي تقول يا ساتر اصل انا بخاف من عيونها !!

،،

فاكره برضه عم صالح اللي ياما حكتلي عنه وقلت اسمه عكس شخصه

كنت تيجي تقوللي صالح حد فاسد .. كل همه يادوب مصالحه !!

وكنت فجأه تشد شعري .. ” إضحكي .. ايه ساكته ليه ” !!

كنت اقولك كنت بسمع

كنت برضه تروح قايللي وانتي مالك !
“قصدي اضحك وشك الساكت يا بارده وانتي مالك يعني بيه ؟؟!”

كنت بضحك من سعادتي وكنت اقولك

” انت اهبل ياد يا سكر !!
تحكي عن حد بـ لسانك
أسمعك واسكت عشانك !!
وفجأه تيجي تغير عليا وفجأه تيجي تقوللى فجأه وانتي مالك تعرفيه ؟! “

كنت تطويني بـ دراعك جوه حضنك ..
همس صوتك كان يوشوشني فـ هدوء الصبح بدري
والشوارع ساكته ساكته
وهمس صوتك بيعاكسني … ” انتي ملكي ، انتي بس بتاعتي وحدي “

كنت اضحك وابتسملك …كنت اقولك ماشي هسكت بعشقك انا يعني برضه !!

توحشك حبة رزاله ، يجي اول حد ماشي يعدي جنبك …

فجأه فجأه تقوله ” اشهد مين مابيحسش بـ غيره لما تبقى حبيبته قرده !! “

كنت اموت فـ الضحكه منك !!

يااااااااااه يا دمعي ايه كفايه السطر شايل بحر منك !!

حتى طعم الضحكه برضه معاك وحشني

بندهش من شكل دمعي !!

ياااااااااه كإنك كنت قصه .. مش حكايه وعشنا فيها

ياااه يا دنيا لو تشوفي قلوبنا مره وتدخليها

كنتي تبكي وتحلفي ما تكرريها !

كنتي فجأه هــ تحضنيها

تحلفي ما هتوجعيها

تحلفي ما تفرقيها عن عيون وحشاها موووووووووووووووت !!

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى