بلياتشو ..مسابقة الشعر العامى بقلم / محمد محمد الساعى من مصر

قرررب هاتلاقي المتعه كتير
ماتخش يابيه .. قرَّبي يا مدام
عندنا شاعر / بربابته بيعزف احلى كلام
ويعيَّش كل اللي بيسمع
في بحور اوهام
عن بطل الساحه اللي بيهزم ..
في جيوش اعداء
والبت الحلوه ام ضفاير ..
وعيونها اللي بتنطق اشواق
وبتتحداك ..
وبيوصف حالك / ف نشوفك
مجذوب بيفرق في المولد
ع الناس كونياك
وزعيم السيرك المتَّنك ع الكرسي هناك
بيلم ف كرشه شقا المساكين
ومسلط على رقابينا سيوف الحوجه /
بعصايته العوجه..
يرسم خطوتنا على السكاكين
مستقبل طين
وبثقة المفتون بكلامه ..
بيقول الدنيا هاتصبح وردي وانتوا معايا
واخيراً .. اعرفكوا بنفسي
محسوبكوا البلياتشو الساخر
ابو توب الوان / ودموع أسود
من ليل احزان
راسم ع الوش بريشة قهر ..
البسمه الزايفه اللي بتخدع قلب الاطفال
علشان تفرح
مع ان القلب بينزف هم
ودا مين هايحس .. ومين يهتم
وبتشكي همومك للعالم ..
ما بتلقاش رد
وكأن العالم .. أعمى أصم
ف باسلم للامر الواقع
وامشي في طريق مرسوم سلفاً
بس سؤالي ..
كم واحد فيكم شاف نفسه ..
رقاصه تهز ف اوجاعها لاجل عيالها
مش لاقيه القوت من فتحة شيش
كام واحد فيكم كان حاوي ..
واستحمل م الايام تلطيش
كام شاعر نافق .. باع الوهم ف شكل قصيده
لاجل العيش
كام كرش بيبلع قوت الناس .. وبدون احساس
يوعدكوا بجنه تلاقوا مافيش
كام واحد فيكم عاش بلياتشو بدون ما يحس
خبى الاحزان جواه والفرح يا دوب تناتيش
جايين تستمتعوا بالفُرجه؟؟
وعيونكوا بتضحك مبتسمين؟؟
اضحكوا اكتر واكتر واكتر
دانتوا الفرجه ..
ومانتوش حااسين

#محمد_الساعي