بهية والدرويش . قصيدة بقلم الشاعر / جودة فتحى

_________

عيونها السودا دباحه…

كأنها ريشة ويا كمان ..

ولما الكحل يملاها…

يدوب العقل ف الفنجان…

ورمشها ديما القاتل…

يخلى الكون يعيش ف جنان…

وألمس كفها الدافى…

كأنه حرير من الجنة…

وعقلي يروح مع التوهان…

عشقت غزال بيتمخطر…

وأغزله من شعاع الشمس…

خيوط وكأنها أوتار…

كأن الليل مع سكونه…

حصان جامح ومتعطر…

وياما العين شافت عشاق…

أتارى تمشى تشوف أكتر…

يا بنت الأيه يا سحرانى…

مليش ف الدنيا غير الله…

قابلت حورية أنسية…

وأخاف أحلم وأقوم م الحلم…

ألاقى غزالى مش ليا…

يقوم العقل منى يتوه…

وأنا الدرويش بجلابية…

وأمشى أنادى بين الناس…

محدش شاف غزال شارد…

محدش شاف جنية…

وألبس م الثياب الخيش…

وسيف اليأس يهزمنى…

وأسأل نفسى يا نفسى…

يا ترى من غيرك أقدر أعيش…

ويبقى الحزن عكازى…

وألضم م النجوم العمر…

وألف الكون على قدمى…

أنا الدرويش وأبقا ياسين…

ومش قادر على وجعى…

وحبك ف الوريد دمى…

بشوفك انسى أنا همى…

يا عشق القلب يا بهية…

يا عشق القلب يا بهية…