بوست فى حب التمثيل ..بقلم الفنانة / وفاء صادق

النجوم الكبار علشان يبقوا نجوم عملوا مجهود كبير وأدوار كتير صغيرة أو كبيرة ..ركزوا جامد وعملوا أعمال ناجحة كتير ..ده خللى الجمهور يصدقهم ويحبهم ويبقى عاوز يشوفهم كتير ..ومنهم كتير مازالوا بيحاولوا يحافظوا على النجوميه دى ….سواء مسرح او سينما أو تليفزيون ..

وطول الوقت بتلعب لعبه الكراسى الموسيقيه..الشاطر هو المركز ..

فى ناس نجحت وناس استمرت وفى ناس أول ما اتحطوا فى الصف الأول بقوا مش مهتمين فبينتهوا زى ما ابتدوا بالضبط ..

ليه بقول الكلام ده ..علشان النجومية مش الدور الكبير أو الدور الرئيسى وإلا ما كنتش شوفت معاهم ممثلين آخرين مهمين جدا..

مثال فى ب١٠٠وش عندك نجمة جميلة ونجم رائع بس من غير الكوكبة الجميلة (العصابة) ما كنتش حتستمع بالتمثيل كده ..ليه علشان كل واحد فيهم نجم بس بطريقته كل واحد فيهم خللى دوره أهم وأحلى دور ..دى نجومية..

فى بقى مثال آخر..حيث أنى بكمل المسلسلات دلوقتى ..

فى مسلسل لنجمة مشهورة ومحبوبة معاها فى دور مهم جدا ممثله أخدت دورها ودور النجمة وراحت بيهم فى داهية ..

الممثل لو بيقول جملة فى الحدوتة مهم …

وهنا بيبان المخرج الشاطر..

والممثل الشاطر

والمنتج الشاطر

الممثل الشاطر الموهوب رزق حتى لو بيقول جملة…يبقى نجم فيها ..

والممثل اللى بيعرف يقول كلمتين وخلاص مالوش أى معنى حتى لو حلو ولابس جميل وعامل كل الحركات ..

التمثيل مهنه التشخيص مش التجميل ..

انا كتبت الكلام ده من كتر ما انا حزينة على دور جميل راح فى داهيه وقلل من شغل نجمة كبيرة …

ايوه الممثل الردئ ياخد الممثل الحلو معاه مهما كان شاطر ..

اصلها عامله زى البنج بونج..محدش ينفع يعمل حدوتة لوحدة ..

#بكلم نفسى على فكرة..