**** تخاريف صايم **** ****************** وحوي يا وحوي ورمضان جانا جانا بفرحة وشوق وشموع بس يا حسرة في اول ليلة
كان النور عندنا مقطوع
روحنا نجيب فوانيس ضربونا
قومنا رجعنا بنبكي دموع
بس دموعنا دي كانت كدبة
ده احنا بكينا يا ناس م الجوع
هو المغرب ادّن .. لسه
روح طب واسأل ايه الموضوع
جايز نسيوا ويمكن صوتهم
كان صوت واطي ومش مسموع
فين يا ولية المحشى قوليلي
واوعي تقولي ده اكل سبوع
عاوز فتة وطاجن بامية
ورز يكفي ست نجوع
واوعي الفول ابو زيت والشوربة
اخلصي حالا ده انا موجوع
وطي الراديو يا ست ذكية
اه يا نافوخي هموت م الجوع
خف يا راجل واهدى شوية
اما صحيح والله مفجوع
ربنا قال الصوم ده عبادة
صلاة وصيام وسجود وركوع
مش عكننة وزعيق ع الفاضي
ده انت بجد راجل مسروع
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
