المفترض …. أكسر دراع اليأس واخرج م الشقوق واسحَب من الغيم المطر ينزل يبوس الأرض شوق المفترض … أفرض على الليل الكئيب طعم الشروق يرجع لنهر النيل حلاوته اللي اتنست وكل بذره ف أرضي م الأفراح تدوق دنا من بداية المبتدى الألفة ع الناس أجمعين من قبل م الكون يتبني وانا نهر حاضن ضفتين وترابي م المسك اتخلق ومعطّره … راس الحُسين أنا خوفو .. خفرع .. منقرع
أنا من خلع .. تاج الملوك الجاية قاصدة الإحتلال أنا م البداية صوت جرس وآدان بترنيمة بلال مش أي ريح حتهزني دنا مهما ليل العتمة طال باقدر أشد الشمس تاني لحضرتي واغزل شعاع الضي شال أنا بحر ف الشرق الجميل مع بحر تاني ف الشمال أنا صوت جمال هز الوجود لحظة م أممنا القنال فرعين من النيل العظيم رافعين علامة نصر إعلان الخلود أنا لما يبخل كل شئ ف الكون أجود .. وعشان كده … مهما هيصطنعوا الحدود هفضل على مر العصور مدنه وجرس لحظة ما هنطق بالكلام
الكل جنبي حيتخرس أنا سندريلا ف الغيطان وانا برضه على مر الزمان فارس على جناح الفرس أنا جدر نخله ف السحاب أنا باب … وكل الناس حرس تعظيم سلام ……………………
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
