تقاسيم ..مسابقة الشعر العامى بقلم / أسامة محمد على من مصر

مفتتح

من كتر الهمّ والحزن
اللي عشش ف قلبنا
معدناش عرفين طريقنا منين
ومن كترالبراويز السودة
الفاضيه والملينانه
اللي علقناها ع الشوارع
و علي وشوش البيوت
نسينا في زحمة السواد
لون الحيطان

1
مينا
عشت يا بلدي
لما شفتك حزينة
فاكة الضفاير
وبتترحمي علي
عصر مينا
2
الوجع
شلت همك يا بلدي
علي كتفي
من سنين
وقسمت الوجع
مابيني ومابينك
نصين
نص ف قلبي
ونص جوه
قصيدة
3
المتاهة
خيط المتاهة
ما بيني وما بينك
ممدود
والليل علي أبوابنا
علي دروبنا
بيكتب بصوابع
نجومة الدبلانة
أفيش النهاية
مهزلة
4
شموع المهزلة
فيكي يا بلدي من زمان منقادة
والوشوش من الطين منحوتة
يبقي أزاي هيتخلق فيكي
الندي والمرمر
والنية سودة
5
تعب

تعبان أنا يابلدي
من كتر ماشفت فيكي
تعبان انا يابلدي
من كتر ماسمعت
عنك
تعبان لحد ما التعب
باض في قلبي بيضة
6
فرح
سنين يا بلدي
وأنا بغزل توب
فرحك علي نول قديم
والحزن فارش غناوية
تحت رجليكي سجادة
وسنين يا بلدي
وانتي حاسة بالطلق
بس ابدا عمرنا مشفنالك
ولادة
اسامه محمد علي
مضر/سوهاج