الاسم/مى أحمد إسماعيل مرسال
جمهورية مصر العربيه
مسابقة شعر العاميه
………………………………………….
تِكِى لَم … تِكِى لَم
بونجور ع الكل وجودمورننج
وشالوم وسلام وكلام كالبنج
أنا حاوى وساحر ومسافر
على أرض ما تعرف طعم الضنك
ولا داقت جوع ولا حلم فشنك
أنا حاوى خطير
وبسحرى هاخلى الكل يطير
ويروح للجنه وللراحه
على أرض الخير
ف جيوبى كنوز
أقدار وحظوظ
أنا جى أنصحكو ب دون تأخير
تخلعو أحلامكو وتدونى
وتبيعو حياتكو وتهدونى
دا الحظ ماهوش محتاج تفكير
اوعاكو تكونو ياناس خايفين
دا هناك هنروحها ف غمضة عين
بكلام مسحور ع الكل يعم
وبصوتى هقول
تِكِى لَم … تِكِى لَم
**************
ويازارع رجلك ف الطينه
الأرض الشرقانه حزينه
والفاس على كتفك ترنيمه
تعزف أحزان الخوف م الجوع
أنا جاى لك ومعاى غنيمه
سكة أفراح وماليها رجوع
وتبيع أحلام مره عديمه
لا بتقدر تلمسها يا عم
ولا تصبح يوم لقمه يتيمه
تحشرها ف بطن صغير الفم
أنا عندى هناك دنيا لذيذه
مكنونه ف قوة تعويذه
هتريح بالك م الهم
قول يللا …
تِكِى لَم … تِكِى لَم
********************
الكل اهتم
وفحيح الحاوى ف أفكارهم
عشش كالسم
السمرا وفاتت منديلها
أبو قويه جنان
الساحر يوم طال جدايلها
هجت م الخان
ضاعت وضاع سحره ووهمه
تاهت ب اسمه
ف بحور نسيان
الرمل بدل جناينها وأمان يومها
ب سنين حرمان
الحاوى باع ديل جلابيتها وكل سيغتها
ناحت ومن بعد خيبتها …
راح الكردان
ياسمرا فُتى الجلابيه تتاخد ليه
ولبستى توب جينز بدالها
ورقصتى باليه !!!!!
عواد ياضايع مين بايع
ضل الشجره
وضفيرة القمح السمحه و طهر الخضره
وليه نسيت طعم جدودك ف رغيف العيش
وقتلت حلمك ب خنوعك
كان سهل يعيش !!!
عواد هناك فاق ياخواننا
مالقاش جنه
ولا اترسم ف شقوق رجليه
نقش الحنه
الحاوى ساقهم بخناسه لدنيا نخاسه
وقال عبيد واماء للبيع والسوق اتلم
دلال بضاعتى انما هيه
فيها الغيه
ومعايا صك العبوديه………
تكى لم .. تكى لم
عواد على خده دموعه
حلم رجوعه
للفاس والطين
بعد انكسار نفسه وصوته
علشان قوته
والناس شاهدين
على انه باع طرحة أمه وسنين همه
لسراب خداع
عواد ما عاد هيبيع شمسه
ولا خير أمسه
ولا عاد ينباع
