خاص بمسابقة شعر العامية
قصيدة
جايب زرار المريلة
………………
((مشهد أول))
لسه القلب خضار وبيحبي
فوق على صدر الدنيا بحالها
حلمه يا دوب لساه متخبّى
بين احضانها وجوه عيونها
لما يتهته كلمة ماما
قلبها يخرج بره حدوده
تلمح جوه عيونه الضحكه
تضحك عينها
تلقى الضى بيحضن وشه
لما يقولها
((مشهد تانى))
شب القلب النونو شويه
بس حياته زى ما هيّ
شايف امه حدوده وكونه
جوه عيونه كل الدنيا
هى كمان بتشوفه حياتها
يلعب يهرب جوه عيونها
عمره ما نامش ف اوضه لواحده
دايما نومه بين احضانها
رغم فاضله يا دوب سنتين
يكمل عمره ست سنين
من مصروفه محوّش ياما
علشان عيد ست الحلوين
((مشهد تالت))
كل الدنيا سواد فى سواد
اللى بيبكى
واللى تصوّت
واللى يطبطب كتف الواد
أما الواد مش فاهم حاجه
عينه تلف ف كل مكان
فينك روحتى ؟
ليه مش شايف منك الا
صوره كبيره على الجدران
حس الرعشه بتدخل جسمه
حس كأنه صبح عريان
فجأة ونزفت عينه دموعها
كما نهرين ضخوا الفيضان
((مشهد رابع))
أول يوم يلبس مريلته
أول يوم بيروح مدرسته
لكن حزنه مغطى جبينه
أول مرة بيمشى لواحده
((مشهد خامس))
واحدة غريبه تنام فى مكانها
أم أبوه جابهاله بدالها
حاسب عندك
انت كبرت وروح على اوضتك
من دلوقتى ورايح اعرف
نومك يبقى ف أوضه لواحدك
المريله مقطوعه يا طنط
قوللى يا ماما
أخر مرّة بنقولهالك
امشى وبكرة اخيّطهالك
((مشهد سادس))
قضّى الليله ف حضن الصورة
يحضنها بنفسه المكسورة
فينك روحتى ؟ !إزاى هنت عليكى وغيبتى؟
طلع الصبح عليه فى الهم
راح مدرسته ف عيد الام
جوه الفصل
قلبه الطيب حس المر
ساب الزينه وساب الحفلة
ساب مدرسته وراح ع القبر
((أخر مشهد))
مد الإيد بزرار مريلته
إيده التانيه الخيط والإبرة
واترجاها
بدمعه تجر الدمعه وراها
ترجع تانى معاه على بيتهم
أو تقبل..
يقعد وياها
