مسابقة مهرجان همسة الدولى للأدب والفنون
فرع شعر العامية
الاسم/ حلمى قاسم على
محافظة قنا / مصر
*************************************
جدع حمّال
*****************
على كفوفك آيات الصبر
بتنشد غنوة للملكوت
ومن نبع الجبين بساتين
فى وقت الجوعة لقمة قوت
وكتفك لاسمر الطاهر
ف عز التوهة ضِل بيوت
مداين قلبك العامر
سَكن للفعل مش للصوت
يا شايل ع المدى أحمال
وفايت فى الغروب روحك
مراكب قلبك الحمّال
سنين عايمة على جروحك
ولوم بوحك على الأيام
مهوِّن ذبذبات هَمك
ولو دمَّك يسيل مواويل
بتمسح شَدْوِها بكُمك
وتفضل زى ما انت أصيل
تصبّر حيلك المهدود
تطبطب ع الوجع بشويش
بإيمانك تشد العود
يا فارس فى الميدان وحدك
وماسك بإيدك الأحلام
يا زارع بالحياة أرضك
ودايس بالخُطا قدَّام
سواعدك للبُنا طاقة
وللمصنع مكن وتروس
ومهما الشمس حراقة
تفوت علىِ صعبها وتدوس
وتفضل روحك الراضية
تدندن للشقا حكايات
وقلبك يغزل الهمة
على سفح الأمانى تبات
