ظبطّت المنبه من بالليل
و حلمت انى اقوم بدرى
و اصحّى الشمس بإديا
و قلت اطبعلى كام بوسة
على خدودها بدون إنذار
ما خفتش أتلسع منها
لان شفايفي ضد النار
و بـ اتسحّب بكل هدوء
و بـ أسرق طاقة من نورها
و اوزعها على خدود البنات البِكر
و احوّلهم كما الفراشات
يدورو بخفة و بلهفة
فِ قلب جنينة الياسمين
أنا خلصت وِرد اليوم
رقيت نفسي …
أنا أصلى من النوع
اللى نجمُه خفيف
بتحسدنى عيون الناس
بشكل مخيف
و يمكن فيها أرقد شهر
و ليه الستات بتكرهنى
لدرجة إنى بقرا ساعات
على وشوشهم :
” حـ اموت مِ القهر “
يا رب انا قلبي مش اسمر
و لا اتلون بلون تانى
انا لسانى عود أخضر
و بكتب شعر و أغانى
و بـ احلم إنى أتشعلق
على النجمات …
و اغنى بس غنوة حب
منا أصلى بحب نجاة
و بعشق عشقها للبحر
و صوت فيروز بيسحبنى
لحد جزيرة مهجورة
بيسكنها ملوك الجن
و بـ اتكعبل فِ بنورة
فتطلع منها حورية ..
تلف تدور كما النحلة
تزن .. تطن …
و بتدندن …..
( كلماتٍ ليست كالكلمات )
فَ بجرى و اضمها لحضنى
و نرقص رقصة مجنونة
لحد ما فجأة بتحول ..
و أشكِّل نفسي من تانى
فبختار إنى اكون نملة
عشان احمى الفصيل كله
و احصّن نفسي بالقرآن
عشان ما تجيش ..
جيوش سليمان
تحطمنا ..
و ف الآخر يقولوا عليا
عاش فقرى
و مات غرقان
الشاعرة هناء نوار
