الفيلم الروائى القصير .. حاس أمن بقلم / أشرف فؤاد مشهد 1 : ن / خ / د لقطة عامة على بنك من الخارج و ناس تدخل و تخرج منه مع أصوات فى كل مكان – تقترب الكاميرا شيئا فشيئا حتى تدخل من باب البنك إلى الداخل و كأن الكاميرا هى شخص يدخل البنك لتكشف لنا الكاميرا عن رجل فى الأربعينات من عمره واقفا يرتدى ملابس الأمن و يدعى فرج بعد أن دخل البنك و هو ينظر بعين الحقد و الحسد على بعض رجال الأعمال و هم يقومون بسحب أموال طائلة من الشباك و يضعونها فى حقائب خاصة ، لنجد أحد رجال الأعمال و يدعى عاطف الألفتى يتحدث مع موظف الشباك .. عاطف : عاوز أسحب 2 مليون جنيه من فضلك قطع كادر .. الكاميرا تقترب شيئا فشيئا على وجه فرج حارس الأمن فرج محدثا نفسه بتعجب .. فرج : 2 مليون جنيه !! .. هيعمل بيهم إيه !! ده فيه ناس بتقبض 300 جنيه فى الشهر .. تلاقيه هيجيب بيهم عربيه للمدام .. والباقى يجيب بيه هدايا للحريم بتوعه اللى بيسهر معاهم فى الكباريهات .. حسبنا الله و نعم الوكيل . قطــع ... 2 مشهد 2 : ن / خ عاطف الألفتى خارج من باب البنك متجها نحو سيارته بالخارج و من ورائه يخرج مسرعا فرج حارس الأمن ، و هو يحمل له حقيبتين أموال . عاطف محدثا فرج بتعصب .. عاطف بيه : إخلص يا بنى آدم ، إنت لسه محطتش الفلوس فى شنطة العربية ، هتلفت الأنظار لينا .. دول 2 مليون جنيه فاهم ، شكلك لسه مفطرتش ! فرج محدثا رجل الأعمال بعد أن وضع الحقائب فى شنطة السيارة .. فرج : تأمرنى بأى خدمة تانيه يا عاطف بيه . رجل الأعمال من داخل سيارته يمد يده و يضع 5 جنيهات فى يد حارس الأمن و يردد بنبرة ساخرة .. عاطف بيه : خد ال 5 جنيه دى يدوبك تعرف تشيلها .. ما أنت مش عارف تشيل 2 مليون جنيه !! ينطلق رجل الأعمال بسيارته مسرعا .. قطع كادر .. زووم إن على وجه حـارس الامن وهو ينظر باسف على مبلغ ال 5 جنيهات .. فرج : 5 جنيه !! .. 5 جنيه يااا .. يا عااااطف بيه ! قطـــع ... 3 مشهد 3 : ل / د ( شقة قديمة بحى شعبى ) الكاميرا تستعرض لنا أنحاء مختلفة من شقة قديمة عبارة عن غرفة و صالة ثم تستعرض لنا الكاميرا .. سيدة فى الثلاثينات من عمرها تدعى سعدية تجلس على الأرض فى الصالة مع ابنائها الثلاثة فى المراحل الأبتدائية المختلفة و تقوم بمعاونتهم على الإستذكار و بجوارهم صينيه شاى و بعض السندوتشات .. قطع كادر .. غرفة فرج حارس الأمن و هو أمام دولاب غرفته و يمسك ببعض المجوهرات فى يده اليمنى بينما يمسك بصندوق المجوهرات بيده اليسرى و يتفحص فيهم و فجاة تدخل عليه زوجته و يرتبك فرج سعدية بصوت عالى .. سعدية : إيه اللى إنت ماسكه فى إيدك ده يا فرج !! .. مجوهرات دى و لا أكدب عنيا .. ورينى كده ! .. دى فالصو و لا حقيقى سعدية تمد يدها للمجوهرات و فرج يمنعها .. فرج : سيبى إيدك دى لأقطعهالك .. طبعا حقيقى تخبط على صدرها .. سعدية : يااالهوى .. إنت سرقت يا فرج !! 4 فرج محاولا إستعادة هدوئه .. فرج : سرقت إيه يا وليه يا مجنونه إنتى .. ده واحد عميل عندنا فى البنك و يعرفنى و بيثق فيا و بيحبنى جدا طلب منى أشيله المجوهرات دى عندى فى البيت لحد ما ييجى مسافر بره مصر و هياخدهم منى تانى و هيدينى حلاوة كبيرة أقدر ادفع بيها مصاريف مدارس العيال . سعدية بنبرة شك .. سعدية : و لو إن الحكاية دى مش داخلة دماغى .. بس هصدقك فرج : بطلى رغى .. أنا هشيل الصندوق ده فى الدولاب بتاعى و أقفل عليه .. عاوزك تحطيه جوه عنيكى .. أحسن لو راح الصندوق أنا أروح فى 60 داهية .. و العيال تضيع .. فاهمه يا سعدية ! سعدية : فاهمه ياخويا .. هو أنا حمارة ! يمسكها من ذراعيها .. فرج : أخوكى مين يا هبلة إنتى .. أنا جوزك حبيبك سعدية تبتسم بخجل و يبدو عليها السذاجة .. سعدية : أيوه أيوه .. كل عقلى بكلمتين ياخويااا فرج بضيق .. فرج : أخوياا برضه !! .. ما علينا .. العيال نامت ؟ سعدية بدلال .. سعدية : أيوه يا خويا فرج محتضنا سعدية فرج : طاب أطفى النور ياختى ! يطفئ النور ليحدث اظلام تام قطـــــع ... 5 مشهد 4 : ن / خ الكاميرا تقترب شيئا فشيئا على حارس الأمن و هو يقرأ الجريدة بسرعه خارج البنكواقفا، زووم إن على خبر بالجريدة تحت عنوان عاطف الألفتى رجل الاعمال المعروف يتهم خادمته بسرقة صندوق المجوهرات الخاص بزوجته ، زووم إن على وجه فرج حارس الأمن و هو ينظر بإحتقار على الخبر قطع كادر .. أحد رجال الأعمال و هو ينزل من السيارة متجها نحو البنك ، فيقوم فرج بإلقاء الجريدة و يسرع ورائه و يدخل معه البنك .. قطـــــع ... 6 مشهد 5 : ن / د رجل الأعمال بعد أن قام بسحب مبلغ كبير من المال و يحمل ورائه السائق الخاص به حقيبة الأموال ، يتوجه إليه فرج حارس الأمن مسرعا ليأخذ الحقيبة من السائق ، و لكن رجل الأعمال يرفض .. سمير بيه : لالا سيبه متاخدش منه حاجة .. شوف شغلك إنت متجيش ورايا .. أنا معايا السواق بتاعى يتركه رجل الاعمال المعروف سمير ناصف و يخرج من البنك و معه سائقه و ينظر له فرج بكراهية .. فرج : حتى ال 5 جنيه بقشيش بقيتوا تستكتروها علينا .. فالحين بس تعملوا الخير قدام الكاميرات .. هتروحوا من ربنا فين ! قطــــــع ... 7 مشهد 6 : ل / خ تقترب الكاميرا شيئا فشيئا على رجل مقنع يرتدى ملابس سوداء و قناع أسود و يتسلق شجرة مجاورة لفيلا فخمة ثم يقفز من الشجرة إلى بلكونة الفيلا و يستخدم أدوات فى فتح شباب البلكونه لينجح فى فتحه بالفعل و يدخل للغرفة و يغلق الشباك ورائه مرة أخرى قطـــــــع ... 8 مشهد 7 : ل / د الرجل المقنع بداخل غرفة مكتب فخمه بالفيلا تمتلئ بالعديد من التحف و مكتب فخم و بجوار المكتب توجد خزينة ، كل هذا يتم إستعراضه من خلال بطارية الرجل المقنع لبتى تجوب فى أنحاء المكان المظلم بحثا عن مكان الخزينة ، يتجه الرجل المقنع نحو الخزينة و يخرج من حقيبته أدوات معينة و يبدأ فى محاولة فتحها ، و فجأة يضئ نور الغرفة ، فيرتبك الرجل المقنع ، لتدخل سيدة فى الثلاثينات من عمرها تدعى سحر يبدو عليها الرقى و الحزن فى وقت واحد و معها طفلة تدعى لوجى عمرها 7 سنوات حليقة الرأس تماما .. سحر هانم : يالا يا لوجى يا حبيبتى .. أنا عارفه إنك بتحبى ترسمى فى مكتب بابى .. يالا أقعدى على كرسى المكتب و أرسمى صورة حلوة عشان تفرحى بيها بابى لما ييجى من السفر فجأة يهجم الرجل المقنع على الطفلة لوجى و يكمم فمها بيده حتى لا تصرخ .. المقنع : لو صرختى أو أتحركتى من مكانك هقتل بنتك سحر و هى فى قمة الذهول و غير مصدقة لما يحدث أمامها .. سحر : إنت مين ؟ .. و عاوز من بنتى إيه ؟! الرجل المقنع بصوت مرتبك .. المقنع : مش عاوز من بنتك حاجة .. أنا كنت جاى أسرق اللى فى الخزنة دى مش أكتر 9 سحر بنبرة خوف على ابنتها .. سحر : إسرق اللى إنت عاوزه .. خد كل حاجة بس أرجوك شيل إيدك من على بؤ بنتى .. دى مريضة و عندها سرطان و ممكن تروح فيها المقنع : و أفرض صرخت لو سبتها ! سحر بتأكيد .. سحر : لا متخافش أنا هقولها .. هى بتسمع كلامى سحر تركض على ركبتيها موجهة كلامها لأبنتها لوجى و ابنتها تؤكد لها الموافقة بعينها .. سحر : لوجى حبيبتى .. لما عمو يسيبك أوعى تصرخى و تيجى جنبى هنا و تسمعى كل الكلام اللى يقوله عمو المقنع : انا هسيب البنت و هخليها تيجى تقف جنبك بس تلاته بالله العظيم لو حد فيكم صرخ أو يعمل حركة كده و لا كده .. هقتلكم أنتم الأتنين .. فاهمين سحر بتأكيد .. سحر : لا متخافش .. أنا بوعدك بده الرجل المقنع يترك لوجى لتجرى و ترتمى فى أحضان أمها و كأنه يتذكر .. المقنع : إنتى كنتى قلتيلى بنتك مريضة بإيه ؟ و هى تكاد تبكى .. سحر : عندها سرطان أطفال و بتتعالج بقالها سنتين منه .. و ممكن تروح منى فى أى وقت .. و باباها بيصرف عليها فلوس أد كده .. و لولا الرعاية و المستشفيات الكبيرة اللى بنوديها فيها .. كان زمانها ين إيدين ربنا دلوقتى الرجل المقنع محاولا التذكر .. المقنع : هو إنتى جوزك عليه ديون كتيرة و مش عارف يسددها و متعرض للإفلاس سحر بتعجب .. سحر : ده حقيقى فعلا .. بس أنت عرفت منين و إزاى ! .. محدش يعرف حكاية الديون دى غير سمير جوزى و أنا و سعدية الدادة 10 بتاعة لوجى بنتى !! الرجل المقنع ينزع القناع من على رأسه أمام سحر .. المقنع : أنا فرج حارس أمن فى البنك اللى جوزك بيسحب فلوس منه و جوز سعدية الدادة بتاعة لوجى بنتك زووم إن على وجه فرج وهو يسترجع ذكرى معينة لحوار دار بينه و بين زوجته سعدية عن سحر وزوجها رجل الأعمال سمير ناصف قطــــــع ... 11 مشهد 8 : ل / د ( فلاش باك : غرفة نوم فرج ) فرج و زوجته سعدية بجوار بعضهما البعض على الفراش يجلسان ، و يبدو على فرج الحزن و الهم و سعدية تربت على صدره بحنان .. سعدية : ياخويا متشيلش هم .. و أحمد ربنا إنت أحسن من غيرك .. أنت عارف الست اللى أنا بشتغل عندها .. ياعينى المسكينة عندها بنت مريضة بالسرطان بيصرفوا عليها دم قلبهم .. و رغم إن جوزها راجل اعمال كبير لكن عليه ديون أد كده و إحتمال يفلس .. و ياعينى أمها قلبها هيتقطع عليها و البنت زالحة مفيهاش و لا شعراية فى راسها من الكيماوى اللى بتاخده .. ياخويا أحمد ربنا إنك ماشى على رجليك سليم وولادك عايشين و بصحتهم .. و تغور الفلوس .. ربك هو اللى بيرزق .. قول الحمد لله ياراجل .. قوول !! فرج بإرتياح الى حد ما .. فرج : الحمد لله قطــــــع ... 12 مشهد 9 : ل / د ( غرفة المكتب بالفيلا ) فرج يفيق من غفلته على صوت سحر مناديا .. سحر : مش معقول .. أنت جوز سعدية .. أنت ! بتأكيد .. فرج : أيوه أنا جوزها فى ذهول .. سحر : مستحيل تكون جوز سعدية .. الست الطيبة الأميرة اللى مبطمنش على بنتى إلا معاها ..مستحيل تكون سعدية عارفه إنك جاى تسرقنى أو حرضتك على كده .. أنا مش حرماها من أى حاجة !! فرج نافيا بعد أن يجلس على كرسى المكتب الأمامى .. فرج : لالالا .. سعدية فعلا متعرفش عنى حاجة .. و لو عرفت إنى بسرق هتاخد العيال و تسيبنى و تطلب الطلاق .. سعدية أشرف من الشرف سحر تجلس على الكرسى المقابل لفرج أمام المكتب و تتحدث بعطف .. سحر : طاب ليه بتسرق ؟! فرج مستدركا بحزن .. فرج : أنا مش حرامى يا هانم ..أيوه أنا مش حرامى سحر تتطلع فى فرج بدهشة .. فرج : متبصليش كده ! .. و الله بجد أنا مش حرامى فعلا .. أنا بعمل كده إنتقام .. أنا بأنتقم من كل الأغنيا اللى مش حاسين بالناس الغلابة .. و كل فلوسهم رايحة ع الكباريهات و الستات و بيستخسروها فينا ، أنا بسرق الأغنيا بس .. و كام ألف و لا حبة مجوهرات لما تتسرق من مليونير مش هتفرق معاه .. لكن هتفرق مع الفقير 13 المحتاج .. وأنا عاوز أعيش و أربى عيالى و أعرف أصرف على مصاريف مدارسهم و أكمل تعليمهم لحد الآخر و لحد ما أشوفهم شغالين فى وظايف كويسة تفتحلهم بيت و تأمن مستقبلهم .. مش متشردين زيي .. أنا خايف على ولادى ياست هانم ! فرج يبكى منهارا فتعطيه سحر منديلا ورقيا من علبة المناديل من على المكتب سحر بشفقة سحر : أنت بتبرر السرقة يا فرج .. السرقة سرقة .. سواء كنت اللى بتسرقه فقير أو غنى .. و انت متعرفش حاجة عن الأغنيا عشان تتهمهم بإنهم مش حاسين بالفقرا و بيسهروا فى الكباريهات و الكلام ده .. مش كل الأغنيا زى بعض يا فرج .. بس تلاقيك انت بس اللى حظك مخلاكش تقابل الكويسين منهم .. الفقر مش عيب يا فرج .. العيب إنك تسرق .. أنا بنتى بتروح منى و مستعدة أدفع كل ثروتى بس بنتى تعيش و جوزى معرض للإفلاس و عليه ديون كتيرة .. و ناس كتيرة أغنيا تلاقيها ممكن تحسد حد فقير بس عايش بصحة هو وولاده و مستور و مرتاح البال .. متبررش السرقة يا فرج و 14 أستغفر ربنا و توب إليه ! فرج و الدموع فى عينيه .. فرج : سامحينى يا ست هانم .. أنا مكنتش أعرف أن سعدية بتشتغل عندك .. دى سعدية بتقول فيكى أشعار .. ولادى اللى رمونى ع المر يا هانم .. أنا عايش بس عشان ولادى سحر : برضه ولادك مش مبرر للسرقة .. و إزاى تقبل إنك تأكل ولادك حرام و تعلمهم حرام .. إنت كده مش بتحبهم .. إنت كده بتأذيهم و بتدمرهم .. كنت تعالالى و احكيلى ظروفك و اكيد كنت هقف جنبك .. و عامة يا فرج .. أنا مش زعلانه منك .. وولادك من النهارده ولادى وانا مسئولة عنهم من كل حاجة لحد ما يتخرجوا من الجامعه و يشتغلوا و ربنا يقوينا أنا و جوزى ع التركة دى .. ع الأقل ربنا هيكرمنى أنا و بنتى عشانهم فرج يركع تحت قدمى سحر و يبكى و يحاول أن يقبل يدها .. فرج : متحرمش منك يا هانم .. أنا آسف سامحينى .. أنتى ست عظيمة و أنا خدامك سحر تمنعه و تجلسه مرة أخرى على الكرسى المقابل لها .. سحر : أستغفر الله العظيم .. متقولش كده يا فرج .. إحنا كلنا واحد عند ربنا .. بالعكس يمكن ربنا عمل كده وخلاك تفكر تسرقنى عشان أكون سبب فى توبتك و عشان انقذك من الهلاك اللى انت كنت داخل فيه برجليك .. ياريت تتوب و تبطل سرقة و تربى عيالك بالحلال 15 الطفلة لوجى تتوجه إلى فرج و تدفعه من كتفه و تردد .. لوجى : عمو فرج .. عمو فرج .. هو إنت أبو عزة و هند و محمد .. دول أنا بحبهم أوى و بلعب معاهم كل اسبوع لما داده سعدية بتجبهم معاهم فى الأجازة بتاعتهم فرج متأثرا و هو يبكى و ينهض و يحمل الطفلة على ذراعه و يقبلها .. فرج : حبيبتى يا لوجى .. هما كمان أكيد بيحبوكى أوى و بيحكولى عليكى كتير .. و إن شاء الله تكبروا مع بعض و تبقوا فى جامعه واحدة و ييجوا يحضروا فرحك و إنتى عروسة لوجى : لا يا عموا أنا مش هتجوز .. هو فيه حد يرضى يتجوز واحدة مفهاش شعر الأم تبكى و فرج يبكى .. فرج : إن شاء الله ربنا يشفيكى بسرعه و يبقى شعرك طويل أوى و تزهئى منه كمان و تقصيه فرج ينزل الطفلة على الأرض متاثرا لتحتضنها أمها .. سحر : يالا يا فرج .. روح إنت بقى لعيالك و مراتك و إفتكر كل كلامى .. و حافظ عليهم و حطهم فى عينيك .. ولادنا نعمة كبيرة يا فرج .. و أرجع لربنا و أغزى الشيطان فرج مترددا .. فرج : يعنى لو مشيت يا هانم مش هتبلغى عنى بعد ماعرفتينى خلاص ؟ بتأكيد .. سحر : معقولة يا فرج بعد الكلام ده كله لسه معرفتنيش .. يا فرج أنا لو عاوزة أبلغ عنك كنت أسيبك تسرق و برضه هبلغ عنك و هيجيبوك حتى لو كنت مخلعتش القناع اللى كنت لابسه ده ! سحر تعطى فرج مبلغا ماليا 16 فى يده و يحاول أن يدعى الرفض و لكنه يقبل فى النهاية .. سحر مبتسمه .. سحر : المبلغ ده مش عشانك ده عشان عيالك أخوات لوجى تجبلهم بيه لبس العيد .. يالا يا فرج روح لعيالك فرحهم و متشلش هم .. أنا مسئولة عنهم بعد ربنا .. بس حسك عينك اسمع إنك رجعت للسرقة تانى .. ساعتها مش هقف جنبك ابدا تانى .. فاااهم !! فرج مستدركا بسرعه .. فرج : لالالا .. توبة و الله .. عمرى ما هقرب للسكة دى تانى .. أنا فعلا زى ما قلتى ربنا بعتنى لملاك زيك عشان يهدينى وأتعلم حاجات كتيرة أوى منك .. وربنا يتولانى أنا و مراتى وولادى .. بعد إذنك يا ست هانم فرج يتوجه للخروج من الشباك بينما تنظر له سحر بتركيز ثم تنادى عليه .. سحر : فررج .. متخرجش من الشباك .. من النهارده إنت هتدخل و تخرج من الباب .. سكة الشبابيك دى أنتهت خلاص .. و أدخلوا البيوت من أبوابها .. أنا هكلم عطية البواب و أقوله إنك قريبى و هخليه يفتحلك باب الجنينة بتاعة الفيلا تخرج منه متقلقش فرج مبتسما .. فرج : حاضر يا هانم .. أشوف وشك بخير .. و متحرمش منك .. سلامو عليكم فرج يخرج من الغرفة و سحر تراقبه حتى خروجه من باب الفيلا 17 سحر لطفلتها لوجى بصوت منخفض .. سحر : لوجى .. بصى من الشباك بسرعه و أبقى قوليلى أول ما عمو فرج ينزل الجنينه لوجى و هى تتجه للشباك .. لوجى : حاضر يا مامى سحر تمسك بالموبايل الخاص بها و تتصل .. سحر : آلو .. أيوه يا عطية .. بقولك اسمعنى بسرعه فيه واحد حرامى هينزلك حالا عشان تخرجه و هو طلع جوز سعدية الدادة بتاعة لوجى و أنا ثبته بكلمتين و ضحكت عليه .. الحيوان نازلك حالا .. أول ما يجيلك أمسكه أنت و عوض الجناينى و كتفوه و بلغوا البوليس عليه هو و الكلبة سعدية مراته .. أكيد هى اللى محرضاه .. آدى آخرة العطف و الشفقة مع الكائنات دى اللى مبيطمرش فيهم و بتبقى النتيجة عكسيه و الطمع بيملى عنيهم .. لازم يترمى فى السجن هو و مراته يالا يا عطية نفذ بسرعه أوعى يهرب منك و الا هخرب بيتك إنت كفاية إنه دخل الفيلا و انت نايم على ودانك .. وبرضه حسابك معايا بعدين يا عطية ! قطـــــــع ... 18 مشهد 10 : ن / د ( غرفة بسجن القناطر ) سعدية ترتدى ملابس السجن البيضاء و عليها رقمها كنزيلة بالسجن و تقوم إدارة السجن بتصويرها سعدية تبكى .. سعدية : أنا بريئة يا فندم و الله صوت نسائى بالسجن .. الصوت : يااالا يا بت مش عاوزة لماضه .. كل اللى بيخشوا هنا بيقولوا كده .. إنجزى يالا عشان تتصورى و قولى إسمك و ورقمك و شغلانتك لو ليكى شغلانه سعدية بحزن و الدمعه تفر من عينيها .. سعدية : سعدية عبد الفتاح راضى 6505 بشتغل .. بشتغل خدامه قطـــــــع ... 19 مشهد 11 : ن / د ( غرفة بسجن طره ) فرج يرتدى ملابس السجن الزرقاء و يمسك رقمه كنزيل بالسجن و تقوم إدارة السجن بتصويره نسمع صوت رجالى بالسجن مناديا .. الصوت : هتقول إسمك و رقم بدلتك و شغلانتك لو ليك شغلانه .. فاهم و لا مخك تخين و هتتعبنا معاك فرج فى إنكسار و حزن و إحساس بالظلم .. فرج : فاهم يا باشا .. فاهم الصوت : طاب يالا إنجز فرج مرددا و الدمعه تفر من عينيه .. فرج : فرج محمود عبد العال 8110 بشتغل .. بشتغل حارس يا فندم الصوت بإستهزاء الصوت : حارس ايه ! .. حارس مرمى ! فرج منكسرا حزينا فرج : لا يا باشا .. بشتغل حارس .. حارس أمن ! التتــــرات ...
