ط
مسابقة الشعر العامى

حالة فريدة .مسابقة شعر العامية بقلم / محمد عبد اللطيف الخضرى من مصر

خاص بالمسابقة
محمد عبداللطيف الخضرى
مصر
01091199085/01117678922
عامية
حاله فريده

( المشهد الاول )
إسلوب حياتى
بيرسم لوحده طريقى ف هواك
وبيبقى عارف إنى ليلاتى
تملى ف قربك باعيش الحياه
وبيبقى شايف طريقة غريبة
تخلى اللى عارف حب الحبيب
يغير ف لحظة معانى هواه
لأنك ف حبك بكل البساطة
بتحب فىّ بإسلوب جديد
إسلوب بيخلق ف سكة حياتى
أمانى بتغزل ف بحر الحياة
تسلسل غرامنا بطوق النجاه
وتحفظ كرامة غرامك ف قلبى
ولو يوم هاخبى حنينى إليك
هتفضح عيونى حكايتى معاك
وإسلوب حياتى بيرسم لوحده
تملى حبيبى طريقى ف هواك
***************
( المشهد الثانى )
حبك حبيبى بيطغى علىّ
حتى أما بوصل حدود النجوم
بلاقى عيونك تناجى ف عينيا
تقول لى تعالى وفادى الغيوم
فبنزل وبانسى حدودى لنفسى
وبانسى انى مالك لكل النجوم
وصانع بإيدى حياة الكواكب
وعمرى ما بلقى ف حبك هموم
ولكنى ببقى ف دُنياْ حبيبى
حروفى بتزرع ف حلمى الورود
بشوفك قصادى ف حاله فريده
تزلزل ما بينا ف كل السدود
مِسلِّم بأمره وبسكن ف عمره
حتى جوارحى عجينه ف هواه
بتشرق ملامحى ف لحظة لقاه
ولو يوم هاخبى حنينى إليك
هتفضح عيونى حكايتى معاك
وإسلوب حياتى بيرسم لوحده
تملى حبيبى طريقى ف هواك
*****************
( المشهد الثالث )
ولما بتبعد عنى حبيبى
عمرى ما أحس إن إنت البعيد
شايفك وحاسك وشامم ف ريحتك
وعطرك بيسرى ف نبض الوريد
بحس بآلامك ودمعة عينيك
وقلبى بينبض بلمسة إيديك
ولما تقولى إمسح لى دمعى
بتبقى دموعى سايلة عليك
ساعتها باحس إنى عايش ف حالة
ودايما ناقصنى أساس الحياه
عينيا ما تقدر تشوف إلا بيك
وإيدى ما تقدر تلامس عينيك
وأجمل عطور الدنيا وطيبها
ما تقدر تأثر بعودها عليك
ولو يوم هاخبى حنينى إليك
هتفضح عيونى حكايتى معاك
وإسلوب حياتى بيرسم لوحده
تملى حبيبى طريقى ف هواك
**************
بقلم “محمد الخضرى “

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى