حدا الساقية
………….
الكل عاود ف الأجازه
وانت لأ
مع إن أمك
من بداية النور ما شق
خبزتلك العيش
اللي كنت بتعشقه
دبحتلك البطّه السمينه تقوّتك
يا عريس وحانت فرحتك
قاعده عروستك
ف انتظارك يا ولد
والكل قاعد
لجل يحضر زفّتك
الكل عاود ف الأجازه
وانت لأ
مع إن أمك من ساعات
راحت حدا الساقيه
تشوفك ع الطريق
وقف القريب جنب الصديق
وعروستك اللي ايديها ف الحنه
هي كمان مستنظراك
وف قلبها الحلم البرئ
طب ليه ما جيتشي ف الميعاد ؟
مع إن شوفت الكل عاد
إيه أخّرك عن زفّتك
أو عن خبيز أمك يا واد ؟
يا صقر قاعد ع الحدود
لا كان هجوم للدبابات
ولا كنّا بنحارب يهود
ولا حتى سكّة رجعتك
كان فيها مزروع البارود
إيه أخرك ؟
دا احنا هنا مستنيين
يا ضنايا قوللي روحت فين ؟
وليه صحابك حزنانين ؟
مع إن واقف ع الشمال
صفّين ملايكه بيضحكوا
والحور على الجنب اليمين
ف عرفت إنك جيت عشان
زفّة إله العالمين
بس اللي ضيّع فرحتي
موتك ما كانش بإيد عدو
دا أخوك وغيّر مذهبه
وارتاح ف حضن المجرمين
ما فهمش إيه معنى الوطن
ولا إيه يكونوا المسلمين
إنت اللي عايش هو مات
ملعون ف كل كتاب ودين
صدقني يا أطيب ولد
كل اللي خانك ميتين
إنت اللي عايش ف السما
ف الجنه طاير بجناحين
والأرض دمّك رح يكون
كما طير حمام
رفرف ما بين القبلتين
الكل عاود ف الأجازه
وانت لأ
علشان مافيش أبدا ملاك
بيعيش ..
ف دنيا الشياطين
…………………………….
محمد ابو العبادى
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
