قصيدة المسابقه …
نَص ” إتناشر فصل ”
غــادة إبراهيم
____________
حدوتة بنت ..
بــ إتناشر فصل ….!!
و..فــ أول فصل ..
كان لسه يناير بــ يخطي ..
و..الشتا خطواته بــ تتخبط
و..النسمه تمايل عــ الجنبين !
و..حنين الصيف كان متسرب
بــ يفوت وبيهرب فــ ثواني
ماقدرش يفوت عكس التيار ..
فــ ماخدش قرار
واتوقف زي البحر الغامض بين شطين ..!!
والبنت الحلوه أم ضفيرتين
كات لسه رموشها السرحانه جناحات عصفوره بـ تتمرجح
بين خوف وشجاعه ولأه و..آه !!
أحلامها تدور عكس الساعه ..
و..كان بكرة بتاعها اما بـ يمشي ..
بـ يبص وراه !!
والبنت الحلوه أم ضفيرتين
كات لسه يادوب بنت العشرين …
و..فــ روحها التايهه مشاعر طفله يادوب عمرها سنتين ..!!
كات غير الناس !!
بــ تنام فــ الليل وتخاف الصبح أما بــ يجي !!
ترتاح لــلصمت وللضلمه ..
وبتعزف على اوتار نايمه
أنغامها سكـــــــــــوت …!!
بــ تخاف مـــ الصوت !!
و..بــ تخشى العمر وألوانه
و..ترتاح لــ الموت !!
،،
كات روحها فراشه بــ جناحاتها !!
عروستها وغنوه
ولوحه
وورق أبيض
وسطور فاضيه
كانوا أغلى ما تملك فــ حياتها ..!!
،،
كات أطيب روح فــ الدنيادي ..!!
كات بــنت مـــلاك !!
،،
ولحد ما كات ..
بنت تستعاشر كات لسه ..
الضحكه بـ تسكن براءتها وبعلو الصوت !!
ولا كان الخوف خطَّى طريقها
ولا تفهم ايه الفرق ما بين الدنيا وبين الموت !!
كات عايشه حياتها بـ تفاصيلها ..
و..ماكنش فـ جوفها كلام مكبوت !!
كان لسه ديسمبر ماخلصشي …
كان لسه يناير ما بدأشي !!
كان لسه الشتا بـ النسبالها احساس مبـــسووووط !!
،،
فــ الفصل التاني فــ قصتها
كات بدأت تفهم دنيتها ..!
اضطرت تعدم ضحكتها ..!
مجبوره تكفن طفولتها ..
تحضنها وتعصر دمعتها
و..تدفنها فــ آخر زاويه جوه تابوت الذات والروح !!
كات أول صرخه تزلزلها !!
كان أول موت ..!!
والبنت الحلوه أم ضفيرتين ..!
بنت العشرين ..
إتمشت حبه فـ وسط الغابه وأشواكها
كات أول مره تحب النور .. وبتتمناه
و..تخاف مــ الضلمه وتكرهها !!
كان أول خوف ..!!
كات حاضنه كيانها بـ دراعاتها !!
كات شايفه حياتها فـ خط إديها زمان !
بـ لسان عرافه بــ تــنكشها
آل يعني هزار !!
كات لسه بـ تضحك لحظتها !
ماكانتش مآمنه بــ خط الإيد .. ولا بـ الفنجان
كان بس فضول ..!!
و..الست الشايبه ام ملامح بـ تخوفها
مسكت ايدها ..
ماقالتش كلام ..!!
ضحكت فـ عيونها ومشتها !
كات حجتها ..
البنت كفوفها إدين طفله ..!!
ماشافتش خطوط !!
،،
فــ الفصل التالت مـ القصه
ضمت أوراقها وكشكولها !
كتبت إحساسها المتوجع
و..حروفها بــ تنطق بـ ذهولها !
كات قاصده تفضفض مش أكتر !
فــ قابلها الواد اللي عشقها
و..علمها الشعر بدون قاعده
ولا نظريات !!
كان أول بحر فـ كل بحور الشعر بــ تعرفها
كان بحر بـ يسكن فـ عيونه !!
والبحر التاني ..
كان دمع عيونه المتسرسب بـ حنان بـ يطيب أوجاعها
كان أول بلسم لـ وجعها ..!!
و..كأن جروحها بـ تتقفل خطوه بـ خطوه من غير تمهيد !!
،،
كات أصدق حاله بــ يكتبها ..!
و..كان أطيب معنى بـ تكتب عنه فـ كشكولها !!
حبها بــ جنوووووون
كات قبل ما تنطق بــ الكلمه .. كان بـ يقولها !!
،،
كان مارس قرب بــ ربيعه !!
كان لسه الورد بـ يتفتح !!
كان لسه أملها بـ يحضن بكرة وبيعافر
والحزن الساكن إحساسها قرب لإيمانه من الضحكه
،،
و..بكل الماضي المتوجع ..
كان بكرة هـ يصبح بيه كافر !!
كات لسه كفوفها بـ تتمدد على أول رف من الأحلام ..
و..بــ تركن شنطة أحزانها
وطفوله مراهقه ماهيش باقي من ضي وجودها إلا الذكرىَ
كات أول مره بـ تفهم ايه معنى الذكرى ..!!
وتقوم من ألف امبارح ميت على بكرة ..!!
كات أول ضحكه بـ تضحكها
من بعد يناير ما ستايره بدأت إعلان أول مشهد
،،
فـ الفصل الرابع كات خايفه
وانعكس الأمل اللي ساكنها
على خوف من بكرة لـــَ يوجعها ..!!
و..فــ عز الصيف نزلت مطره !!
كان دمع عيونها المتجمد !!
،،
فــ الفصل الخامس كان لسه
كان نفس الفارس بــ يقرب !
بــ يجرب يزرع فرحتها !!
،،
من كتر ما كان عقله مغيب
مش شاغل باله الا بـ روحها
كان بادئ يزرع فـ أغسطس !!
و..ثمار الحلم دبحها الحر !!
كان جمر أغسطس بـ يعطش أحلامها الأصلاً عطشانه !!
،،
فـ الفصل السادس
كان جاي عليها وخطواته بـ تسابق نفسه المتقطع !!
سايب أحلامه بــ تتحطم
كان همه وبس يخرجها من وسط النار ..!!
لو كان احساسه بـ يهمسله
كان قاله انها آآآآخر أحلام !
والعجز فـ روحها خلاص صابها
كان خدها فـ حضنه ومات فـ الأرض اللي ترابها
كان أصله رماد أحلام حلوه !!
،،
فــ الفصل السابع ودعــــــــــــها ..!!
كان ماشي يبص وراه ، خايف ، مش شايف لسه الا عيونها !!
كان دمعه رهيــــــــــــــيب !
و..الشمس خجلها فـ مشهد أحزانهم .. خلاها تغيب !!
واتحول شكل الكون فجأه ..
من حر وموت .. لملامح رعد وبرق وأقوى خريف ..
كات أول مره تشوف المطره بـ قسوتها فــ أحضان الصيف !!
،،
في الفصل التامن
كات واحده خلاص حابه جروحها !
و..فــ كل ديسمبر
ماعادتش تزور الطفله المدفونه فـ روحها !!
واعتادت بوحها المتوجع ..
لأ والمدهش … بقى أكتر حاجه بـ تعشقها !!
،،
فــ الفصل التاسع ..
كات واحده اتخيل جمهورها .. مش هي البطله المعتاده !
مش نفس الــ غــــــاده فــ روايتها !!
ولآخر مشهد فـ القصه ..
ظنوا ان اتغير بطلتها …!!
،،
فــ الفصل العاشر
كات هـــُــدنه !
كان صمت وبس ..
وستاير تشبه لــ يناير .. هيجها الريح !!
،،
فــ الفصل الــإحداشر ..
لسه ..
كان بادي نوفمبر يتحرك ..
و..ديسمبر بـــعده يفوت تاني
كات أول مره تزور البنت الوحشاها
من بعد ما هجرت زيارتها ..
المطر اتسرسب من تاني
حــَضنتها وقفلت ستايرها ..
كام زووووم عــ الصوره
بــ يستنوا ..
إعلان لــ نهايه مانزلتشي ..!!
