حدوتة عشق مصرية .. بقلم الشاعر / أحمد بيومي

مين إللي قال أن الحضارة في المدن ..؟
يا سادة ..
حضارة الإنسان بدأت بالزراعة وصناعة الرغيف ..
صنعها إنسان أتحد في وجه المحن والخوف ..
وبصحيح الحضارة هنا في الريف ..
موش في المدينة إللي بتسحق الإنسان ..
لأن الحضارة رقي وأدب ..
مش بلطجة ..وفتونة ..وطولة لسان ..
فيها الضعيف والفقير يتهان ..
الحضارة إحترام الكبير وعطف على الصغير ..
الحضارة غيطان .. وفرن وجرن .. وعيل صغير فرحان ..
وقلوب صافية بتحن على الغلبان ..
الحضارة لمة ..وراكية ..وعافية .. وفن ..
الحضارة خضار ونهار وليل سهار ..
حرية ..بعيد عن السجن والسجان ..
المصنوع من الحجر ومن الخرسان ..
والراحة لقيتها بصراحة هنا ..
على شط ترعة وفي ظل تكعيبة عنب ..
لما سمعت همس النخيل للشجر ..
لقيتها لما صاحبت نسماية في ضي القمر ..
لقيتها في لمة أهل البلد ..
علشان يسلموا على واحد بسيط راجع من السفر ..
لقيتها وسط الخضار والزهر ..
لقيتها مع صوت الفراخ والديوك والحمير والبقر ..
تخيلوا ..أخيراً جداً عرفت أن الحضارة ..
هى إنسجام مابين الطبيعة والبشر ..
وأن الحضارة بتصنعها قلوب بتحب ..
موش قلوب من صخر ..
تغريدة عشق مصرية .. بقلم الشاعر / أحمد بيومي