خاص بالمسابقة
الشعر العامي
الشاعر محمد مهران
(حلم الصبايا الموجوعين )
~~~~~~~~~~~~~
حلم الصبايا الموجوعين بالطرحة
ليه يصبح كابوس ؟
والغدر يكتب فوق صدر فستانها
اللي شغلاه من سنة
متحلميش يوم بالهنا
والزفة تصبح
نعش داير ع البيوت
لحظة سكووووت
أصل الجدع راجع
يودع صُحبته
كل الشباب لطموا الخدود
كيف النسا
والصرخه بتشق الفضا
متأسسة
والصبيه لسه ماسكه
فــ إيدها صوره للجدع
والجدع من جوا بروازها القديم
بيهزها
إياكي مره تدًمعي
مش قولتي مهرك
الشهاده قدوة حسنة
روحي المعسكر يا حبيبتي
وإسمعي
المخلة فيها شعر كاتبه
في خدمتي
|
وعلبة سجاير
لــ شلة صحابي الفسدانين
مش علبتي
ودفتر ورق فيه ذكري
أفراد الكتيبة الطيبة
لساكي برضه مدمعه ؟
صرخة آهاتك
جوا مني مسمعه
لما هيجلك قناوي أو سميح
ابقي أسئليهم ع النيشان
وبلوا شربات الفرح
وإياكي تنسي أي حد
من الجيران
وخليكي فاكره الحر عايش
والموت بيسكن ف الجبان
كان نفسي أجيب فــ الفرح
مزمار صعيدي
وحصان بيرقص
وكنت عازم الباش شويش
وأخونا مرقص
كان جايبلي الحِنه
من سيدنا الحسين
لساكي حاضنه الصورة ؟
حاسبي بروازها القديم
ليجرحك
كان نفسي مره أفرحك
كان نفسي مره أفرحك
إمضاء شهيد
–؛؛؛—؛؛؛————؛؛؛—
