محمد نصر عبد الرحيم السيد
المنوفية – مصر
بعض مشاهد فيلم “حلم مصري ” أما السيناريو بالكامل فلا يمكنني وضعه في تعليق واحد.
مشهد رقم : 1 ليل \ داخلي
كهف الساحر
─ كهف مظلم من الداخل .
─ يُسلط وميض علي أحد الجدران لتظهر
صورة لأحد المصريين القدماء وهو يعمل
بالزراعة ثم إظلام .
─ وميض لتظهر صورة أخري للأهرامات
الثلاثة ثم إظلام .
─ وميض لتظهر صورة كنيسة القاهرة
المعلقة ثم إظلام .
─ ( إضاءة ). الساحر يجلس القرفصاء
وأمامه كورته البلورية .
─ ينظر رجل ( مصري عبدالحق)
إلي الساحر بارتياب شديد . الساحر : تعال – قرب- واقف عندك ليه؟
─ يقترب ( مصري ) من الساحر . الساحر : اتفضل – استريح
مصري : انت مين ؟ وانا جيت هنا ازاي ؟
الساحر : مش عارفني ! ياخسارة . بس العيب
مش عليك . العيب علي حكامك الي ربطوك في
ساقية أكل العيش وسابوك تلف تلف لغاية مانسيت
كل حاجة . ياتري فاكر اسمك ؟
مصري : أيوه طبعا . انا اسمي مصري
طاهر عبد الحق .
الساحر : يااااه . مصري . اسمك جه
علي الجرح يامصري .
مصري ( منفعلا) : ايه ياعم . انت هتحكيلي قصة
حياتك , ماتقول انت مين وتخلصني .
─ يهب الساحر واقفا . الساحر : أنا تاريخ العرب – أنا حضارة أجدادك-
أنا ذكرياتك وأمجادك . أنا ماضي العرب الجميل .
مصري : طب وجايبني عنك ليه ياعم الماضي
هو انا عارف أعيش في الحاضر .
الساحر : علي فكرة أنا مش جايبك هنا بمزاجي
فيه واحد عايز يسلم عليك وهو الي موصيني أجيبك .
مصري : مين هو
─ يصدر الساحر فرقعة بأصابعه .
─ يدخل رجل يرتدي قميصا
مطبوع عليه علم تونس . الساحر : طبعا عارفه – أخوك التونسي .
─ تصدر حركة عن (مصري)
تنم عن خوفه من (التونسي) . الساحر : متخافش … خلاص … من النهارده
مفيش غل ولا حقد . من النهارده فيه حب –
فيه وئام – فيه وحدة عربية .
─ ينظر ( مصري ) إلي
الكرة البلورية شاردا .
( قطع )
___________________________________________________
مشهد رقم : 2 نهار \ خارجي
الشارع
− بعض اللقطات من الثورة التونسية في بداياتها.
( قطع )
___________________________________________________
مشهد رقم : 3 ليل \ داخلي
كهف الساحر
─ (مصري) مازال شاردا .
─ ينظر إليه الساحر في ترقب . الساحر : ايه … رحت فين ؟
─ يفيق مصري من غفوته . مصري ( متسائلا ) : قصدك الثورة ؟
الساحر : قصدك انت الصحوة .
─ يبحث مصري عن التونسي يمينا
ويسار الساحر فلا يجده . مصري : امال فين التونسي ؟
الساحر : بتسأل عليه ليه ؟
مصري : مش هو الي كان عايزني.
الساحر ( مبتسما ) : ولسه عايزك . وسابلك عنوانه
الجديد ( 18 ديسمبر 2010 شارع الحرية –
ميدان الكرامة – ثورة الياسمين ) .
مصري : انت بتحلم .
─ يقترب الساحر من مصري . الساحر ( بحزم ) : الماضي مبيحلمش لأنه
حصل بالفعل . المفروض انت الي تحلم
…. انت المستقبل .
─ ينظر مصري إلي
الساحر في حسرة ويأس . مصري : انت متعرفش المصريين .
الساحر : ماهي المشكلة ان عارفهم . عارفهم كويس
جدا . هم الي منورين وشي . ده انا ماضي العرب يوم
مباجي اتباهي بنفسي . أول حد بفتكره هو المصري
….. يامصري .
مصري : بس انت عايزنا نثور ليه , عمر مالفساد عندنا
ما هيبقي زي الفساد في تونس .
الساحر : مين الي قال كده ؟ ماهي المصيبة انكم ختوا
علي الفساد وبقي جزء من حياتكم .
مصري : مش للدرجة دي يعني .
الساحر : لا للدرجة دي وزيادة , انت مش حاسس
بالفساد الي حوليك في كل مكان وألا ايه ؟ تحب أوريك ؟
─ ينظر مصري إلي
الساحر في ( صمت ) . الساحر ( متحمسا ) : هوريك .
─ يلف الساحر كورته البلورية .
( قطع )
___________________________________________________
مشهد رقم : 4 نهار \ خارجي
أحد الكباري العامة
─ ( TOP ANGEL ) لتوضيح الزحام الشديد علي الكوبري .
─ تستعرض الكاميرا الكوبري من أعلي لأسفل .
─ ( أسفل الكوبري) . أحد باعة الفاكهة والخضار
يعرض بضاعته .
─ يقترب أحد أطفال الشوارع من البائع
, ويخطف بعض من الفاكهة ويجري .
─ يخرج الطفل من الكادر ليظهر خلفه
مجموعة من الشباب يتعاطون المخدرات .
شاب 1 : مش ده ( إخص ) .
─ يظهر في الكادر رجل مختل عقليا
ممزق الثياب – طويل اللحية – يربط
في رأسه كيسا بلاستكيا ويمسك
بيده عصا صغيرة . شاب 2 : أه …. هو .
شاب 3 : يا إخص .
─ ينظر المختل إلي الشباب باشمئزاز . الرجل المختل : إخصصص.
─ بعض الأولاد يضايقون فتاة ترتدي
الجينز ويشكلون دائرة حولها . الرجل المختل ( بغضب ) : إخصصص .
─ يتحرك الرجل مسرعا باتجاه
الفتاة رافعا عصاه فيجري الأولاد
بعيدا عنها .
( قطع )
___________________________________________________
مشهد رقم : 5 نهار \ خارجي
شارع جانبي
( أمام فرن للخبز المدعم )
─ طابور طويل للرجال وآخر
للنساء أمام الفرن .
─ يحاول أحد الرجال الدخول
في أول الصف فيدفعه احدهم للخلف. رجل 1 : رايح فين ياعم انت –
مش عاجبك اللي واقفين دول .
─ يتجه الرجل المتقدم إلي آخر الصف . الرجل المتقدم : خلاص ياعم بالراحة.
رجل 2 : ماتنجز شوية يا أسطي
رضا – ربنا يكرمك – بقلنا تلات
ساعات واقفين .
─ يطل الأسطي رضا من شباك الفرن . الأسطي رضا : أعملكم ايه – العيش
هيخلص والطابور مبيتحركش ….
بقولكم ايه جمعوا الفلوس مع
بعضكم وانا اجيبلكم العيش كله
مرة واحدة .
─ يتسابق الناس لدفع النقود لأول
شخص يقف في الطابور .
─ يخرج الأسطي رضا بعد فترة
وجيزة حاملا شراعا كبيرا عليه
كمية كبيرة من الخبز , ويلقي به
علي الأرض بجوار الفرن . الأسطي رضا : كل واحد ياخد بجنيه
واحد بس – محدش ياخد زيادة-
العملية مش ناقصة .
─يتدافع الناس باتجاه الخبز( الغير آدمي)
الملقي علي الأرض .
( صوت عربة الأنابيب ) .
─ تظهر عربة بيع أنابيب البوتاجاز
في الكادر .
─ يجري الناس بسرعة ناحية
الأنابيب تاركين الخبز علي الأرض.
─ الأسطي رضا يضع شكارتين
من الدقيق المدعم علي ظهر حمار
يقوده طفل صغير ثم يدفع بالحمار
إلي الأمام . الأسطي رضا : يلا بني – قبل محد يشوفك.
─ الرجل المختل يراقب الموقف
عن بعد باشمئزاز . الرجل المختل : إخصصص.
( قطع )
___________________________________________________
مشهد رقم : 6 ليل \ داخلي
كهف الساحر
─ يرفع الساحر يده من علي كرته البلورية . الساحر : ايه رأيك بقي في جمهورية
إخص الي انت عايش فيها .
مصري : انت بتسمي ده فساد ؟
ده العادي ياعم الماضي . امال لوشفت
بقي القطارات الي بتتحرق وألا
العبارات الي بتغرق وألا أكياس
الدم الملوثة .
الساحر : طب مانت عارف وحاسس
أهو … امال ساكت ليه ؟ !!!
مصري : مين قال إن أنا ساكت . دانا
واخدها كعب داير علي المسئولين ,
بس الله يكون في عونهم شايلين حمل
تقيل . هنبقي احنا والمشاكل عليهم .
─ يضحك الساحر بصوت عال . الساحر : المسئولين ؟ تحب تعرف هم فين؟
─ يلف الساحر كرته البلورية بسرعة .
( قطع )
___________________________________________________
مشهد رقم : 7 نهار \ خارجي
أمام أحد الفنادق بشرم الشيخ
─ موكب كبير من السيارات تحت
حراسة أمنية مشددة .
─ ( close up ) علي اسم الفندق
وهو ( أفخم فندق فيكي ياشرم ).
─ بعض أفراد طاقم الأمن الخاص
يتأهبون لاستقبال الموكب . فرد أمن 1 : ايه الهلمة دي كلها
هو الريس نازل عندنا وألا ايه ؟
فرد أمن 2 : ياريت علي قد
ريس واحد دول كوكتيل .
فرد أمن 1 : ازاي يعني ؟
فرد أمن 2 : يعني . حبة وزراء
, علي كام محافظ وعليهم كام
مسئول كبير .
فرد امن 1: ودول جايين يعملوا
ايه بربطة المعلم كده !
فرد أمن 2 : و احنا مالنا – ركز
في شغلك وخلي يومنا يعدوا علي
خير – الله لا يسيئك .
─ ينزل كبار المسئولين من سياراتهم ,
ويتوجهون إلي باب الفندق .
( قطع )
___________________________________________________
مشهد رقم : 8 نهار \ داخلي
داخل الفندق في شرم الشيخ
─ مجموعة لقطات للطبيعة الساحرة داخل الفندق .
─ طاولة سفرة فاخرة تحمل ألوان شتي من الطعام .
─ كبار المسئولين يتعازمون علي من يجلس أولا .
─ ( high angel ) للمسئولين وهم جالسين
بجوار بعضهم البعض .
─ يقترب شخص قصير من المسئولين ( موسيقي تصويرية حزينة ).
حاملا في يده حقيبة كبيرة ويقوم بوضعها
علي المائدة , ثم يفتحها لنكتشف أنها
مملوءة بالنقود ( عملة الدولار ) .
─ ينظر المسئولين إلي بعضهم البعض
في فرح وسرور .
─ يقوم المسئول القصير بتوزيع النقود
علي بقية المسئولين .
( قطع )
___________________________________________________
مشهد رقم : 9 ليل \ داخلي
كهف الساحر
─ ينظر الساحر إلي مصري نظرة ثقة . الساحر : ها
مصري : ياولا التيييييييييت ,
وأنا الي كنت فاكركم من همنا
مبتناموش الليل .
الساحر : هم فعلا مبيناموش
الليل , ولا النهار … أصلهم
لو ناموا مش هيلاقوا وقت
يصرفوا فيه الفلوس دي كلها .
مصري : طب وهم جابوا الفلوس
دي كلها ازاي ؟
─ يضحك الساحر مقهقها . الساحر : ايه يا مصري ! متخلنيش
أغير فكرتي عنك . دانا بقول
عليك ذكي .
─ ينظر مصري إلي الساحر
في ذهول . مصري : يعني ….. ؟
الساحر : يعني انت زي ماسبق
وقلتلك مربوط في ساقية أكل العيش
, ولاغي عقلك ومخدر ضميرك .
مصري : طب انت شايف ايه الحل ؟
الساحر : الحل عند صلاح جاهين .
مصري : الحقني بيه بسرعة .
─ يعطي الساحر ظهره لمصري
, ويهم بالرحيل . الساحر : إقلع غماك ياتور وارفض
تلف – اكسر تروس الساقية واشتم
وتف – قال بس خطوة كمان , خطوة
كمان – ياوصل نهاية السكة يا البير
يجف .
─ يدخل الساحر في دائرة كبيرة من
الضوء حتي يختفي عن الأنظار .
( قطع )
