الإسم/محمود عبدالمنعم سيداحمد
جمهورية مصر العربية
صفحة الفيس بوك الشخصية/محمودعبدالمنعم
رقم التواصل على الواتس /01012218817
رقم التواصل الشخصي/01202919888
فئة شعر العامية
(حنان مارس)
وصعب جداً إني أحكي
وأقول عنها حروف وكلام
ولو كان الكلام يكفي
ما هيكفيني ألفين عام
عشان بس أشكُرها
وكل الشُكر مش إنصاف
دا كُلِّي جزء من نورها
وعلمي بعض تفكيرها
ولو لحظة أغيب عنها
تقول مَرِّت ليالي عِجاف
دي شيفاني أمير الكون
سَيِّد الرجال فارس
وأنا والله مهما هكون
هبات تحت القَدم حارس
دا أمُّي ألف قلب حنون
يا بخْتُه م الشهور مارس
ودا يامَّه تالت مارس…
يا ويلي في دنيتي بعدك
وحشتيني يا غالية كتير
تراب الأرض ليه حاضنك؟
بجد نفسي أنا في حُضنك
ولمسة إيدك الطاهرة
بحنية على شَعْري
وكل دموع من الفرحة
وإنتي بتسمعي شِعري
كأني طفل بتسمي عليه م الأرض
علىٰ فكرة بقيت أنا أب
جات بنوتة تِشبه لِك
وكل ما أشوفها بفتكرك
وترجع السنين بيا
وأشوفك من بعيد جاية
وأقول هيَّ ومش هيَّ
فأبكي تجري تاخديني
تدفيني وتحميني
تقولي فداك يا نور عيني
يا أغلىٰ من حبابي العين
دموعك رايحة مش جايَّة
وبسمع نِنّا هووه فأنام
وتاتا خطي التجربة
يا أجمل ما فيٰ مش كلام
مين علمك يامَّه أصول الطبطبة؟
الوقت عدّىٰ وبرضُه ما حكيت لك حاجات
أحمد وسلمى إتجوزو من شهر فات
والعيلة لمِّتها بترجع من جديد
وأختي الكبيرة جابت آيات
ولسَّاني محتاج لك قوي يامَّه
وبتمنىٰ تضُميني ولو ضمَّة
ياريت العمر كان يرجع
وأنا أوهب لِك حياتي شموع
ولا تشوفي في يوم ضلمَة
سلام دلوقتي يا غالية
هاجي لك بُكره بالثانية
يا قبر كون عليها حنون
في بطنك حِتة م الجنة
في بطنك حِتة م الجنة.
محمودعبدالمنعم
