حواديت ..مسابقةالشعر العامى .بقلم شريف الرفاعى من مصر

داخلين في حضن الوجع
فارشين كلام و نواح
لو حد ساب دنياه
نزعل يومين واهو راح
عاينة الكاسات لإيزيس
و الكفر ليها مباح
لابسة السحاب كقميص
رقع جداره السم
و الهم ….
سابه و فاح
يلعب هناك ع البر
يكسر غصون العرق
احنا الحروف الجر
مالناش رصيف للعشق
و تقولي ايه الفرق
كل اللي ع السطرين
ما شافوا شكل العيش
زارعة الأراضي كآبة
لافة الولاد بالخيش
عاينة الفطار لديابة
بيعبوا في التهميش
قبر المدى لغلابة
كل الطريق كالمش
مين اللي ربى الكرش
بحرس جنيه للبيه
لاجل الرغيف والقرش
بسهر و ابيع الورد
و الغربة لم الفرش
فمتزعليش مني
نسج الحياة حواديت
الله الغني عني
لو غيبت يوم ع الغيط
اصلك مش الصادقة
راصة الكلام كالبيت
و ارجع وانا النادم
لو فيكي يوم حبيت