سيناريو حييو ابو الفساد اسلام محمود مصرى جزء 1
م نهار \ داخلى 1 صالة شقة ام صلاح
انتريه متواضع وسفرة وام صلاح وابنائها احمد و محمود و سحر وسمر يتناولون وجبة الافطار
ام صلاح : بت يا سحر تخلصى الجامعة وعالبيت عدل ملكيش دعوة بالمظاهرات والكلام ده
سحر : فيه ايه يا بطة هو انا لوحدى انا معايا كل زمايلى وبعدين لازم نقول لا علشان حالنا وحال كل واحد فى البلد
ام صلاح : بقولك ايه انا قولت اللى عندى وعلى الله تتأخرى وانت يا محمود عندك وردية ليلية تانى انهارده
محمود : والله يا امى جايز اصل اتنين من الزملاء واخدين اجازة شهر فى اى حد يغيب لازم اطبق مكانه
ام صلاح : ربنا يقويك يا ابنى
سمر : وانا متقلقيش عليا يا ست الكل ساعة وهرجع عالبيت يادوب هودى المقالات والاخبار للنشر وهرجع علطول
احمد : ما انتى خلصتى شغل الاسبوع كله اليومين اللى فاتو تلت ايام بترجعى الساعة سبعة
سمر : وانت مالك بشغلى يا باتع الشهر العقارى انت وكل سنة وانت طيب
احمد : انتى قصدك ايه انا عمرى ما اخدت رشوة
ام صلاح : جرى يا ولاد انتو هتتخانقو قدامى ولا ايه
احمد : ما انتى اللى شوفتى كلامها يامو صلاح
ام صلاح : صلاح هو فين صلاح يا حسرة على صلاح cut قطع
———————————–
م 2 نهار \ داخلى مكتب صلاح سكر المحامى
يدخل عشر محامون يصطفون امام صلاح فى مكتبه
صلاح : طبعا كلكم مستغربين انا جامعكم ليه دلوقتى الساعة ( ينظر فى ساعة يده ) الساعة سبعة ونص الصبح
صلاح : الاجابة بكل بساطة ان غيابى عن المكتب يوم بلص قفل تليفونى يوم بلص اعتمادى عليكم يساوى
( يخرج همام من جيبه الة حاسبة ) بتحسب ايه يا غبى النتيجة معروفة من غير الة حاسبة النتيجة انهيار مكتب صلاح سكر المحامى بالاستئناف العالى ومجلس الدولة وقريب المحامى بالنقض
محامى 1 : حصل ايه يا فندم لكل ده
صلاح : الحق يا همام ده بيناقشنى فسل لسه خريج اول انبراح كلية حقوق بيناقشنى
همام : معلش يا استاذنا اللى ميعرفك يجهللك
صلاح : رغم ان مش من حقك تسئل السؤال ده لكن هجاوبك اللى حصل ان زى انبراح من سنة كان فى جلسة قضية يعنى لو مكنش حد بلغنى ممكن كانت تتشطب انتو مش مقدريين انى مشغول يبقى خلاص
محامى 2 : يعنى يا فندم كنا نعمل ايه قضية من سنة صادفت نفس يوم السنة دى نبلغ الاعلام ونقول حدث بالفعل ولا نبلغ الجرايد ونقولهم ينشرو حدث فى مثل هذا اليوم
صلاح : الحق يا همام ده بيهزر
همام : محامى جديد برده وميعرفش نظام حضرتك
صلاح : يتعلم يا همام انصراف كل واحد على مكتبه يلا والتزمو تعليماتى واحفظوها زى عنيكو
همام : بس فكرة حكاية زى انهارده من سنة دى حضرتك مبدع يا استاذنا بس انا رائى مدام دفتر الجزائات فاضى الاسبوع ومحدش غلط مكنش له لزوم الاجتماع ده
صلاح : لا يا همام النوعية دى لازم كده كل فترة والا هيفردو وينامو والاقى عملوهالى هنا دقو الشماسى احنا عندنا شغل ايه انهارده يا همام
همام : عندنا جلسة الرشوة بتاعت جمال نصحى يا ريس
صلاح : اه يبقى لازم اترافع بنفسى
همام : ربنا يستر
صلاح : بتقول حاجة يا همام
همام : لا بقول ان اكيد حضرتك هتبدع كالعادة
صلاح : ومحدش مقدر يا همام
قطع cut
م 3 نهار \ داخلى قاعة المحكمة
صلاح جالس يستمع للنيابة
النيابة : ورغم من تقاضى المتهم مبلغ الرشوة فى صورة دفعات الا انه لم يفى بوعده باصدار تراخيص البناء للشاكى مما اضطر الشاكى بان يتقدم بالطلب الى النيابة وقد وافقت النيابة العامة على وضع المتهم تحت المراقبة الى ان تم ضبطا متلبسا بتهمة الرشوة والنيابة تطلب من عدالتكم تطبيق المادة 103من قانون العقوبات ليكون المتهم عبرة لكل من تسول له نفسه ارتكاب مثل هذة الجرائم
( صلاح يبدو عليه كانه نام وهو قاعد منتظر وعندما يسمع كلمة الدفاع يتفضل يقوم مسرعا )
صلاح : يا ريس فى مدة السنتين اللى وصفهم الشاكى بانهم المدة التى بدء التعامل بينه وبين المتهم فى المدة دى المتهم مااصدرش اى تراخيص بناء لاى ارض مملوكة للشاكى وبالتالى فان تهمة الرشوة باطلة
النيابة : يا فندم ده تم القبض على المتهم متلبس بتهمة الرشوة
صلاح : نيجى لركن القبض على موكلى فى محضر الضبط مكتوب فقدم له الشاكى حقيبة بنية اللون مغلقة يعنى موكلى وهو قاعد مع الشاكى مكنش يعرف ان الشنطة فيها فلوس وان الشاكى اوهمه ان الشنطة فيها اوراق تخص قطعة الارض وفى المادة 103 اللى بتعتمد عليها النيابة تنص على ان يتوفر القصد الجنائى عند المرتشى يعنى لو الراشى حط ظرف الفلوس فى جيب المرتشى تسقط التهمة وهو ده اللى حصل فى قضيتنا
القاضى : الحكم بعد المداولة
م 4 نهار \ خارجى امام محكمة ….
صلاح واقف بجوار سيارته ومعه همام
همام : كنت هايل يا استاذنا جلجلت فى المحكمة
صلاح : تروح تحصل من نصحى بقية الفلوس انهارده مش مرتشى وعلى قلبه قد كده ويجيي يتنصح على صلاح امين سكر المحامى
همام : اكيد هيدفع يا استاذنا هو عارف هو بيتعامل مع مين
( يرى صلاح فتاة جميلة ترتدى فستان ضيق فيدقق بالنظر عليها يرن هاتف صلاح )
همام : تليفونك يا استاذ
صلاح : اه ( يرد صلاح وهو مازال مدقق النظر على الفتاة ) الو ايوة يا حسام بيه لا بتقل ايه وانت يتقل عليك برده ده انت عسل اه انت حبيبى يا حسام بيه لا كبيرة ايه دى معقولة معقولة قوى مفيش حاجة كبيرة على صلاح سكر المحامى انت لو ترضى يا حسام بيه انا اشتغل فيها من دلوقتى وخاصة ان البال رايق ايوة يا فندم اه البال رايق جدا فالاداء هيكون عالى عالى جدا يا فندم اوك على ميعادنا يا فندم مع السلامة ( يغلق صلاح الهاتف ويضعه فى جيبه تقترب نحوه الفتاة التى كان ينظر اليها )
جيجى : انت محامى
همام : الا محامى ده اكبر محامى فى مصر يا ست هانم
صلاح : اسكت انت يا همام ( يخرج صلاح كارت من جيبه ويعطيه لجيجى ) صلاح سكر المحامى
جيجى : انا جيجى سالم سيدة اعمال هحتاجلك اكيد علشان تقف معايا ضد طليقى
صلاح : اعتبرينى واقف مع حضرتك من دلوقتى وبرجليا التلاتة كمان
جيجى : برجليك التلاتة
صلاح : ايوة يا فندم وهمام كمان برجليه الاتنين واقف مع حضرتك
جيجى : هتصل بحضرتك انا سعيدة انى اتعرفت على حضرتك يا استاذ صلاح
صلاح : انا اسعد يا استاذة جيجى
م 5 نهار \ داخلى مكتب موظفو الشهر العقارى
مواطن 1 جالس امام احمد يخرج من جيبه نقود ويعطيها لاحمد يرد احمد يده
احمد : ايه ده يا فندم
مواطن 1 : يا باشا عشان تشرب شاى وتطلعى التوكيل واخلص
احمد : اسف يا فندم مبقبلش رشوة
مواطن 1 : طب انا اعمل ايه انا حالى واقف بسبك
احمد : وبسبى انا ليه انا فهمت حضرتك مية مرة الاجرائات ولازم الراجل يجىى علشان التوكيل يتعمل اى حاجة خلاف كده تبقى تزوير
مواطن 1 : عالعموم انا عملت اللى عليا يا استاذنا والتوكيل هيخلص بيك من غيرك هيخلص
( ينهض الرجل من على المكتب ويسير خارجا يقف بجواره بتاع البوفيه )
رجل البوفيه : سيبك منه يا سعادة البيه انا هجيبلك اللى يخلصلك الدنيا بس تشوفنى وتشوفه
مواطن 1 : عنيا ليك وليه ( ينصرف الرجل مع رجل البوفيه )
احمد : ده اكيد رجل مجنون
م 6 نهار \ داخلى ريسبشن شقة صلاح
يدخل صلاح يجد نادين مسترخية على كرسى الانتريه تمسك بيدها اليسرى اطراف شعرها
نادين : نطرطلك كتير يا سكر شو اللى اخرك يا عيونى
صلاح : دى جلسة كده يا روحى لو اعرف انك جاية مكنتش اتاخرت يا حياتى بس انتى دخلتى ازاى
نادين : معقول تكون نسيت انت عالدوام بتسيب مفتاح تحت الدواسى كرمال ما اجى افتح الباب علطول
صلاح : فاتتنى دى طب التلاجة عندك وكل حاجة موجودة جهزلنا اى حاجة سريعة على زوقك عبال ما اغير هدومى
م 7 نهار \ داخلى مكتب الدكتور محمود
محمود جالس على مكتبه الذى يجاور مكتب حسن
حسن : ايه يا ابنى فكها بقى مالك
محمود : الاسعار نار يابو على والبت جلدت جنبى مش عارف اتجوزها ولا انا عارف اجيب شقة ايجار ولا حتى عفش الالف جنيه مرتب المستشفى ده هصرف منه ولا هحوش ولا هجيب شبكة ولا مصاريف فرح
حسن : حيلك حيلك يابنى متستلف من اخوك المحامى انت مش بتقول ماشية معاه وشقة مستويين ومكتب فى شارع جامعة الدول
محمود : لا يا ابنى مينفعش ده امى ممكن تموت فيها ربنا يحلها من عنده
م 8 نهار \ داخلى شقة صلاح
صلاح جالس على الارض يأكل بطيخ ونادين ترقص وعلى الكاسيت مقطع للدرجة دى من اغنية مستنياك لنانسى عجرم
م 9 نهار \ داخلى مكتب رئيس التحرير
سمر امام رئيس التحرير
رئيس التحرير : هايل يا سمر مقالاتك مكسرة الدنيا بس يريت كمان تتكلمى عن اضطهاد الاسلامين من نظام مبارك واعوانه
سمر : انا بكتب بلسان الشعب عن اى حاجة ضد الشعب الاسلامين فصيل زى اى فصيل من الشعب انا مش مع حد ضد حد ولا ضد حد عشان حد
رئيس التحرير : طب يا سمر تقدرى تروحى وبرده فكرى فى كلامى احنا محتاجين دعم التيار الاسلامى لينا ده مش قليل
سمر : يا ريس انا بمثل الشعب كله فلو اتكلمت عن التيار الاسلامى اللى ليه الف صوت ينطق بيه من باب اولى اتكلم عن التيار الفقير المعدم اللى صوته اتنبح وملوش حد حاسس بيه سلام
م 10 نهار \ داخلى ريسبشن شقة صلاح
يرن هاتف منزل صلاح ثم يبدء الانسر ماشين
الانسر ماشين : انا صلاح صلوحة ابو الصلح المحامى انا مش موجود دلوقتى لو عايزنى فى حاجة مهمة سيب رسالتك لو مش مهمة يريت متوجعش دماغى صباح الفل
همام : انا همام يا استاذنا ابراهيم عبد ربه بتاع قضية التربح فى المكتب وعايز حضرتك
م 11 غرفة نوم صلاح
صلاح مستلقيا على سريره يرن موبيل صلاح فياخذه من على الكمودينو المجاور للسرير
صلاح : ايه يا همام انت مش شايفنى نايم عايز ايه
عبد ربه ايه سيبك منه قله الاستاذ مسافر ايه صوت الجرس ده مين دخل اخلينى ثوانى ماشى مين جيجى هانم
بتاعت الصبح انا جاى حالا يا همام بس مشى عبد ربه وسيب جيجى لا مش عايز اعمل ايه يا استاذ و
الكلام ده اتصرف مليش دعوة اتصرف قوله اى حاجة مليش دماغ ليه بس اسمع اما اقولك اوعى تمشى جيجى سلام يا همام
( يغلق صلاح المكالمة ويعيد الهاتف الى مكانه تدخل عليه الغرفة نادين بالروب و تسرح شعرها المبلل بالفرشاة
نادين : تليفون شغل
صلاح : اه همام الغبى مبيعرفش يتصرف لوحده معلش انا اسف يا حبيبتى اصله هيغرقنى كده فلازم انزل
نادين : اوكى مع انى مشتقتلك كتير
صلاح : معلش يا روحى هعوض هالك
م 12 نهار \ داخلى مكتب صلاح
يدخل صلاح المكتب تقوم جيجى يتبادلان التصافح ثم يجلسون
صلاح : المكتب نور يا مدام جيجى
جيجى : المكتب منور باصحابه
صلاح : ازاى بقى ان حاسس ان قبل ما تيجى علطول النور كان قاطع عندنا
جيجى : ميرسى نتكلم فى الشغل
صلاح : اوكى اتفضلى
جيجى : انا وطليقى اتطلقنا من شهر تقريبا بس احنا شركاء فى شركة استيراد وتصدير بس فيه ما بينا دايما خلافات انا عايزة اشترى نصيبه علشان مش عايزة مشاكل فى الادارة
صلاح : حضرتك نسبتك كام فى المية
جيجى : 65 فى المية
صلاح : محلولة حضرتك لان نسبتك اكبر فى الحق الاكبر لالادارة واتخاذ القرار لحضرتك وده هيسهل علينا كتير الشراء وكمان هيقلل السعر
جيجى : هو كرهنا فى البيت والشغل والشركة انا مبطيقش البنى ادم ده
صلاح : عايز حضرتك تعتبرى الموضوع منتهى وزى ما جوز حضرتك كرهك فى البيت والشغل هقدر انا برده احبب حضرتك فى البيت والشغل واحل كل مشاكلك ( تضحك جيجى )
صلاح : الليمون يا همام للهانم بسرعة
م 13 نهار \ داخلى بنك الدم مستشفى الحياة
محمود يمر فى طرقة المستشفى امام بنك الدم والممرضة امام عم مسعود لتصرف اكياس الدم
الممرضة : اتفضل يا عم مسعود اذن صرف خمس اكياس دم بس استنضف ده مريض مهم
عم مسعود : ماتلمى لسانك اللى عايز قطعه ده هو جه فى ايه المرة دى
الممرضة : هيكون ايه حادثة عربية برضه
عم مسعود : ربنا يشفى كل مريض يارب
م 14 نهار \ داخلى مكتب صلاح
صلاح جالس على مكتبه يدخل الفراش
الفراش : افندم اوامرك يا استاذنا
صلاح : عايز فنجان قهوة زيادة
الفراش : من عنيا يا استاذنا
يسرح صلاح قليلا
م 15 نهار \ داخلى صالة شقة ام صلاح
فاطمة ام صلاح تدفع بصلاح الى خارج الشقة واخوته يشاهدون بتأثر
صلاح : جرى ايه لكل ده
فاطمة : سكتك غير سكتنا يا ابنى
صلاح : ليه كل ده علشان قبلت قضية
فاطمة : يا تسيب القضية دى وتبعد عن اى قضية مشبوهة ياما متعتبش البيت ده
صلاح : اسف يا امى مش هسيب القضية
فاطمة : يبقى مع السلامة
صلاح : سلام يا امى
سمر : صلاح استنى يا صلاح
سحر : ابيه صلاح
محمود : صلاح استنى يا صلاح
احمد : صلاح يا صلاح ( يخرج صلاح ويغلق الباب )
م 16 نهار \ داخلى مكتب صلاح
الفراش امام صلاح يضع فنجان القهوة امام صلاح على المكتب
الفراش : القهوة يا بيه
صلاح : ماشى يا عم سيد
م 17 نهار \ داخلى مكتب احمد
احمد جالس على مكتبه وفادى منصت له وحولهم المواطننون
احمد : انا تعبت خلاص و الشغل مبيخلصش
( تدخل سارة غرفة المكتب وتقف امام احمد )
سارة : انا خلصت شغل قلت اعدى عليك
احمد : نورتى المكان وحشتينى جدا قدامى نص ساعة وهخلص عدى على صاحبتك دعاء
عبال ما اخلص ونخرج سوا
سارة : اوك سلام ( تخرج سارة )
فادى : ايوة يا سيدى اديك روقت اهو
احمد : مش ناقصاك خالص يا فادى
م 18 نهار \ خارجى حديقة الاسماك
محمود جالس بجوار فرح يده فى يديها
فرح : يا ابنى فكها بقى هانت
محمود : هانت ازاى بس الحال هو الحال مش هيتغير
فرح : يا سيدى انا هستناك يوم اتنين عشرة انا جنبك وصابرة ومستنية
محمود : ربنا يعدل الاحوال بقولك ايه وحشتينى
فرح : ايوة بقى
محمود : ايوة بقى انتى
م 19 نهار \ داخلى نقابة المحامين الجيزة
صلاح يسير فى احد طرق النقابة وهو تكلم فى الموبيل يصتطدم بريهام فتقع ارضا ويقع من يديها ملف اوراق والارض مبللة فتفسد بعض الاوراق
صلاح : انا اسف جدا
ريهام : يعنى ايه يا استاذ اسف جدا استفدت انا ايه شغل الناس وقضاياهم راحت والورق باظ
صلاح : ان شاء الله خير عندى استعداد اساعد حضرتك فى تطليع الاوراق دى من تانى
ريهام : خلاص يا استاذ اللى حصل حصل بس يريت تانى مرة متتكلمش فى التليفون وانت ماشى
صلاح : لا يا فندم دى غلطتى ولازم اصلحها وهطلع لحضرتك كل الورق اللى باظ وبعدين حتى لو مش انا السبب احنا زملاء
ريهام : اوك اللى تشوفه
صلاح : بصى مش هينفع نتكلم واحنا واقفين هنا خلصتى شغلك فى النقابة
ريهام : اه طب تعالى نروح نكمل كلامنا فى كفاية ونشوف الورق اللى باظ
م 20 نهار \ خارجى قهوة بلدى
صلاح بجوار ريهام على طرابيزة على واجهة القهوة
صبى القهوجى : اومر يا عمهم
صلاح : اتنين شيشة اص
ريهام : نعم شيشة اص
صلاح : خلاص هاتلها شيشة تفاح
ريهام : شيشة ايه وبتاع ايه انت هتزر يا استاذ
صلاح : صلاح اسمى صلاح وانتى
ريهام : اسمى ريهام ( الجراسون يحضر اتنين شيشة )
صبى القهوجى : الشيشة يا عمهم لحضرتك وللاستاذة
ريهام : استاذة ايه انا مش هشرب شيشة
صلاح : خلاص عادى اشربهم انا
م 21 نهار \ خارجى مسمط
صلاح جالس بجوار ريهام على طرابيزة فى مسمط
صلاح : اربعة كبدة كمان واربعة مخ و تضربى معايا كوارع
ريهام : نعم اضرب كوراع
صلاح : خلاص يبقى هاتلها فشة وكرشة
ريهام : ممكن اعرف ايه المكان اللى انت جايبنى فيه ده
صلاح : لعلمك ده اغلى مسمط فى المنطقة واكله ايه مقولقيش واقولك ليه ما انتى دوقتى الكبدة
ريهام : يا استاذ صلاح انا شغلى وتعبى كله راح وحضرتك بتهزر
صلاح : ما انا قولتلك يا استاذة ولا اقول يا ريهام حاف خلاص مبقاش فى تكليف بعد الفشة والكرشة
ريهام : يا استاذ خلصنى
صلاح : بصى انتى عندك حق مش هينفع هنا نشوف ورق تعالى نقعد فى اى كفاية بجد
ريهام : يا استاذ كده بجد مش هينفع من قهوة لمسمط لدلوقتى بتقولى كفاية بعد كده هتاخدنى فين
صلاح : عالبيت طبعا
ريهام : نعم
صلاح : قصدى هنخلص فى الكفاية وهتروحى عالبيت
م 22 ليل \ خارجى قهوة الفيشاوى
صلاح وريهام على طرابيزة فى قهوة الفيشاوى
ريهام : اليوم طار ومعملناش حاجة مفيدة
صلاح : تعرفى انى ممكن اخلصلك كل ورقك وقضايكى فى دقايق
ريهام : يا سلام ليه انت مين
صلاح : مسمعتيش عن صلاح سكر المحامى
ريهام : انت صلاح سكر انت من اشهر خمس محامين فى مصر
صلاح : ها تشربى ايه بقى
( رجل كبير جالس ورائهم يعزف ويغنى كنت فين وانا فين جيتلى منين )
م 23 ليل \ داخلى صالة شقة ام صلاح
ام صلاح واولادها احمد ومحمود وسحر وسمر يتناولون وجبة العشاء
سمر : ملوخيتك يا بطة ملهاش حل
ام صلاح : بالهنا والشفا يا روح قلب بطة
سحر : ولا المسقعة يا وعدى عليها
ام صلاح : طب كويس انا اكلى عجبكو
احمد : ولا الرقاق يا بطة يا وعدى
ام صلاح : لا بقى فيه ايه انتو ولادى وعجناكو وخبزاكو عايزيين ايه يا ولاد بطة
محمود : بصراحة كنا عايزيين صلاح ييجى يصالح حضرتك
ام صلاح : تصبحو على خير ( تقوم ام صلاح من على السفرة )
سمر : طب كملى اكلك
ام صلاح : اكلت والحمد لله ( تغادر ام صلاح الغرفة )
احمد : انا مش فاهم هو عمل ايه لكل ده ده شغله عادى
سمر : لا لو على عمل هو عمل القواضى اللى بيقبلها دى هى السبب
احمد : ده شغله
سمر : يا سلام يعنى انت تقبل تاخد رشوة وتقول اهو شغلى
احمد : لا
سمر : شوفته
احمد : عشان خايف اتمسك بس واترفد
محمود : كفاية بقى يا جماعة لغاية كده احنا عملنا اللى علينا
سحر : صح
م 24 ل \ د ريسبشن شقة صلاح
يفتح صلاح باب الشقة بمفتاحه ثم يدخل ويغلق الباب
صلاح : كنت فين وانا فين جيتلى منين ترا را
ان : مساء خير صولااه
صلاح : ( بدهشة انزعاج ) يا ليلة صينى
ان : انت دياق يا صولااه
صلاح : ايه اللى جابك يا بنت منشو يو
ان : انا متعود اجى لك لم كون عايز
صلاح : مش وقتك خالص يا ان
م 25 ن \ د صالة شقة ام صلاح
ام صلاح تجلس على السفرة بعد ان انتهت من وضع اطباق الافطار يخرج احمد ومحمود وسمر وسحر ويقبلون راسها
+ الابناء : احنا اسفين يا بطة
ام صلاح : ( تبتسم ) خلاص محصلش حاجة اعدو يا ولاد ( كل منهم يسحب كرسى ويجلس )
انا مبكرهش اخوكو ده ابن البكرى ويستحيل اكره انا بقرص ودينه يمكن يرجع عن سكته اللى هو ماشى فيها
سمر : مش يمكن بعدك عنه هو اللى مخليه مكمل فى السكة دى غيرى النظرية يا بطوط
ام صلاح : سيبوها على الله يا ولاد هو القادر على كل شىء
م 26 ن \ د مكتب صلاح سكر المحامى
يدخل عشر محامون يصطفون امام صلاح فى مكتبه
صلاح : طبعا كلكم مستغربين انا جامعكم ليه دلوقتى الساعة ( ينظر فى ساعة يده ) الساعة ثمانية الصبح
الاجابة هى بزوغ الاهمال والفشل فى مكتب صلاح سكر المحامى ( ينظر احد المحامين فى ساعته ) بتبص فى ساعتك ليه عارف ان عندكو جلسات تلات دقايق بالظبط وهخلص كلامى انهارده الخميس المفروض اجازة بالليل من المكتب مفيش اجازة بالليل هفتح دفتر غلطات الشهر واكتر واحد عنده غلطات هيفارقنا انهارده وهنقوله حظ سىء فى حياتك العملية لانك فاشل مفلحتش مع صلاح سكر المحامى الاجتماع انتهى
م 27 ن \ د امام مبنى الشهر العقارى
احمد يحاول الدخول يجد حراسة كبيرة تمنعه من الدخول وامن مركزى
احمد : عن اذنك
الحارس : ممنوع الدخول
احمد : ممنوع الدخول ايه يا عم انا شغال هنا
الحارس : انهارده اجازة لكل الموظفين
احمد : ليه بقى ان شاء الله
الحارس : عند تعليمات مقولش اى حاجة لاى حد مهما كانت سلطته ( يذهب احمد الى البواب ويعطى له عشرة جنيه ) هو فيه ايه يا عم ابراهيم
البواب : الظاهر كده يا بنى والله اعلم بيعملو توكيل للرئيس بنقل ملكية قصر الرئاسة
احمد : نعم دى لعبة كبيرة قوى
م 28 ن \ د شقة صلاح المحامى
يدق احمد الباب كثيرا ليجد نوسة تفتح له الباب
احمد : انتى مين
نوسة : انت اللى مين وايه اللى جابك شقة صلوحة فى وقت بدرى كده
احمد : انتى خدامة ولا وضعك ايه هنا
نوسة : خدامة ايه يعنيا انا صاحبة بيت انا نوسة يا عنيا
احمد : بصى لولا انك فى بيت اخويا ومش عارف وضعك ايه كان ممكن ناخد وندى بشكل ودى هنا لكن انا خايف لا يتسيحلى
نوسة : طب ما تيجى ومش هسيحلك وانت امور ومحلاونى كده ( تملس بيدها على شعره )
احمد : بقولك ايه انا متلصم بالعافية فرصة تانى يا نوسة ( يخرج احمد وينزل الدرج )
نوسة : هو الخسران والنعمة
م 29 ن \ د كلية الاداب
سحر واقفة مع زملائها يتحدثون عن الثورة
زميلة 1 : هتنزلى فى مظاهرات 25 يا سحر
سحر : طبعا هنزل وانتو كلكم لازم تنزلو دى مصر يا جماعة وده واجب وطنى
زميل 1 : هو فعلا الريس ده افترى كتير ولازم يمشى هو والحزب الوطنى بتاعه
زميلة 2 : انا عن نفسى مش هنزل مامى بتخاف عليا
م 30 ن \ د مكتب صلاح سكر المحامى
يدخل احمد يجد صلاح جالسلا على مكتبه يتحدث فى تليفونه المحمول
صلاح : ماشى مع السلامة مع السلامة اذيك يا احمد ايه الزيارة العزيزة دى
احمد : انا روحتلك البيت ملقتقش لقيت فتحتلى واحدة اسمها نوسة دى مين دى يا صلاح
صلاح : نوسة ده مش ميعادها
احمد : ايه
صلاح : دى مديرة منزل بتكنس وتمسح بتشوف طلباتى يعنى
احمد : اه ربنا يقويك يا اخويا
صلاح : المهم ايه سر الزيارة الجميلة دى
احمد : فى حاجة غريبة حصلت انهارده عندى فى الشغل
صلاح : حصل ايه
احمد : روحت الشغل منعونى من الدخول لقيت حراسة مشددة وامن مركزى
صلاح : علشان ايه
احمد : سئلت عم ابراهيم الفراش قالى الريس بينقل لنفسه ملكية قصر الرياسة
صلاح : ده لعب على كبير قوى الرجل ده عمل زى واحد صاحبى باع كل حاجة فلقى نفسه على الحديدة فراح بعاها فملقاش حاجة يقف عليها ممكن يوم 25 تتغير حاجات كتير
احمد : المهم انا اعمل ايه
صلاح : انت متعملش حاجة دى لعبة كبيرة قوى وانت ملكش دخل فيها واوعى تقول لحد ولا حتى لاختك الصحفية دى علشان متضرهاش احمد ركز فى كلامى
احمد : حاضر انا قولت اجى استشيرك واكيد هعمل بنصيحتك
م 31 ن \ د الشهر العقارى مكتب المدير
المدير : سيادة اللوا فى واحد شغال معانا هنا انا قلقان منه انه ممكن يعمل مشاكل
اللواء : هو مين ده
المدير : احمد امين سكر
م 32 ن \ د مكتب الصحفية سمر امين سكر فى الجريدة
سمر جالسة على مكتبها تشخبط على ورقة بيضاء وبجوارها سعاد زميلاتها تشاهدها
سعاد : انتى بتعملى ايه
سمر : هكون بعمل ايه فراغ مفيش اخبار مفيش مصادر مش لاقية حاجة اعملها
سعاد : ربنا يشفيكى بقى كل اللى البلد فيه ده ومفيش اخبار ده الدنيا مقلوبة علشان المظاهرات اللى هتبقى يوم 25
سمر : وممكن يحصل حاجة وممكن ميحصلش المهم هنكتب ايه
م 33 ن \ خ كازينو على النيل
صلاح وريهام على طرابيزة فى كازينو ياتى الجراسون وينزل امامهم اتنين ليمون
صلاح : وفيت بوعدى
ريهام : الحقيقة مكنتش اتخيل ان كل الاوراق دى تخلص فى 24 ساعة
صلاح : صدقتينى قولتلك انا صلاح سكر المحامى
ريهام : ماشى يا صلاح
صلاح : امال فين استاذ صلاح اللى كنتى بتقوليها علطول
ريهام : ( تكشر ريهام ) يا استاذ صلاح
صلاح : بهزر معاكى اى حاجة تحتاجيها مكتبى مفتوحلك 48 ساعة فى ال 24 ساعة
ريهام : اكيد يا صلاح
م 34 ل \ د صالة شقة ام صلاح
ام صلاح واقفة تبكى وامامها اولادها محمود وسمر وسحر
سمر : اهدى يا ماما ( تحضن سمر امها وتطبطب عليها ) هيجى دلوقتى ان شاء الله
ام صلاح : مرجعش ليه لغاية دلوقتى
محمود : يمكن راح لصلاح وبات عنده
ام صلاح : لا احمد ميعملش هنا ميباتش عند اخوه من غير ما يقولى انا قلبى واكلنى اكيد اخوكو حصله حاجة
سحر : متقوليش كده يا ماما ان شاء الله بخير
سمر : ان شاء الله هيرجع دلوقتى وهتطمنى عليه
محمود : انا هتصل بصلاح علشان اتاكد انه مش عنده
م 35 ل \ د مكتب صلاح
صلاح وامامه المحامون مصطفين صف واحد
صلاح : ملف الجزاءت هيتفتح دلوقتى اللحظة الحاسمة من برنامج صلاح ايدل فيه واحد فيكم هيفارقنا
( يرن الهاتف المحمول يرد صلاح ) الو ايوة يا محمود ازيك ايه احمد لا مش عندى اه طيب انا عرفت هو فين مع السلامة ( يغلق صلاح المكالمة ) تقدرو تمشو يا استاذة اتفضلو روحو دلوقتى هنكمل بعدين
م 36 ل \ د غرفة فى امن الدولة
احمد جالس امام الظابط فى غرفة مظلمة يحقق معه
الظابط : بقى انت مش عارف انت هنا ليه يا روح امك
احمد : لا مش عارف يا فندم
الظابط : انا اقولك روحت لاخوك المحامى ليه مش علشان تودود فى مواضيع ملكش فيها واكبر منك وتمس الدولة
احمد : محصلش انا روحت ازوره عادى
الظابط : انا هخليك تعرف ان الله حق حالا
م 37 ل \ د مكتب صلاح
صلاح جالس على مكتب يتحدث فى الموبايل
صلاح : الو ازيك يا سيادة اللوا انا صلاح سكر ازى صحة معاليك اتمنى انك تكون بخير اخويا يا فندم احمد امين سكر عندكو يا فندم فى مقر امن الدولة لا يا فندم هو كان جاى يزورنى عادى هو انسان محترم وبيحب بلده اه يا فندم عارف العنوان شاكر افضال معاليك
م 38 ل \ خ امام مبنى امن الدولة
صلاح واحمد امام مقر امن الدولة
صلاح : ينفع كده يا استاذ تخرج تتكلم على القهوة هو ماتش كورة افهم يا بنى ادم للحرية حدود
احمد : انا معملتش حاجة
صلاح : اتفضل قدامى
م 39 ل \ د صالة شقة ام صلاح
يدق الباب تفتح ام صلاح تجد امامها احمد تحتضنه يدخل احمد وصلاح
ام صلاح : كنت فين يا حبيبى
صلاح : مش مهم كان فين المهم انه رجع بالسلامة
ام صلاح : متشكريين
صلاح : على ايه انى دورت على اخويا
سمر : ادخل يا صلاح
سحر : اجيبلك حاجة تاكلها
صلاح : متشكر اذيك يا سحر عاملة ايه واحشنى يا سمر اذيك يا محمود
محمود : الحمد لله اذيك انت يا صلاح واحشنى جدا
صلاح : لو واحشك كنت تسئل تصبحو على خير سلام
م 40 ل \ خ سيارة صلاح
صلاح فى السيارة على كاسيت السيارة اغنية اليسا واحدة عادية مقطع بصراحة لو عندك نية تيجى ليا تتعرف بيا انا واحدة عادية
م 41 ل \ د ريسبشن شقة ام صلاح
يفتح صلاح باب شقته ويدخل
صلاح : بصراحة لو عندك نية تيجى ليا تتعرف بيا انا بت لاعبية امريكية او طلانية صينية او من الشرابية او من الوراق ( يجد صلاح نوسة امامه تأكل ترمس )
نوسة : كده برده يا صاصا تكدرنى التكديرة ورحمة ابويا كنت همشى وهفلق من هنا
صلاح : تفلقى حقك تفلقى نوسة منه لله يا ابوكى اللى طلقك عليا
نوسة : اسكت مش اتحبس وسكوله الدكان
صلاح : سكوله الدكان
نوسة : قال ايه يا اخويا قفشو عنده بيسة
صلاح : بيسة يعنى ايه
نوسة : المدعوقة البودرة بيسموها بيسة
صلاح : بصى يا نوسة لو صاصا غالى عندك ترجعى الوراق تانى انا فيا اللى مكفينى انهارده
نوسة : بقى كده تكسر بخاطر نونوس حبيبتك
صلاح : معلش يا نونوس وحياة صاصا امشى دلوقتى
نوسة : هامشى يا عسل
صلاح : لا سكر
نوسة : همشى يا سكر ما هو اصل الالاتى اللى اتعود على بيانو متكيفوش الطبلة
صلاح : طبلة طب امشى يا نوسة بدل ما تحصلى ابوكى عالقناطر عدل فى قضية اداب
م 42 ن \ د مكتب صلاح المحامى
همام جالس امام مكتب صلاح وصلاح فى وضعية سرحان
همام : يا ريس استاذنا صلاح يا صلاح
صلاح : ايه اللى سمعته ده انت بتقولى صلاح حاف يا همام
همام : انا اسف يا استاذنا ما انت مش سامعنى
صلاح : عايز ايه همام
همام : احنا مش اصحاب ودفعة واحدة
صلاح : قصر عايز ايه
همام : انا عايز اعرف بتتعرف عليهم ازاى وايه هو اسلوبك وكمان جنسيات مختلفة
صلاح : ايه يا همام هو مش الموضوع ده المفروض يكون فى طى الكمتان
همام : مهو مفيش حد بره يا استاذ حتى الفراش لسه مجاش
صلاح : اوك بص يا همام التكنك واحد رغم اختلاف الدخلة كل ست ليها دخلة فى واحدة ممكن تدخله من الثقافة والاطلاع وواحدة من الفلوس والمادة وفيه واحدة من الذكاء وفيه من القوة دخلات كتير بس اهم حاجة انك تبهرها من ودانها وعينها يعنى كلام وفعل
همام : طب واللغة
صلاح : انت عارف انى اعرف سبع لغات وباقى اللغات بحفظ الكلمتين المهمين وخلاص
همام : منا حاولت اعمل كده قبل كده وواحدة كرفتنى
صلاح : كرفتك انت قهوة
همام : اه كرفتنى وعاشت عليا الدور قال وعايزة جواز وشقة فى التجمع وهى بتمشى مع الواد جمعة
صلاح : انت مفيش منك فايدة انسى كل اللى انا قولته
