خروج من حدود الشرنقه.خاص بمسابقة الشعر العامي.شعر / محمد محمد الساعي من مصر
قصيدة خروج من حدود الشرنقه شعر / محمد محمد الساعي من مصر
خاص بمسابقة الشعر العامي
خروج من حدود الشرنقه
حطم جدار الخوف بقى
وفُك حبل المشنقه..
حوالين رقبتك وابتسم
هاتلاقي ضحكه بتترسم
متشوقه
واعمل مخاوفك كلها
عصافير ورق
واطلق سراحها تسَمَّعك
صوت زقزقه
افرح بقى … واسمع بقى
محتاج لايه علشان تفوق
تخرج بروحك من نيران
المحرقه
****
اطلق سراحك ياللي عايش
جوا سجن برغبتك
وافتح شبابيك الامل
على نور صباح
علشان تنول حريتك
وارمي اللي كان بيخوفك
جواك وحطم محبسك
لساك بشر
لساك يا دوب ترس ف طاحونة
الحياه
لازم تدور علشان ماتكمل
دورة الكون الوسيع
ويا القمر
اياك في يوم تنسي انك انت
– رغم كل المستحيل –
لساك … بشر
ف افرح بقى ..
واخرج بقى
من قلب شرنقة الألم
كفياك شقا
كفاياك تعيش دور الضحيه
المرغمه على سجنها
والدنيا تبقى كأنها.. على وسعها
ف عنيك كأنها خرم إبره
ضيقه
حرر ايدينك م القيود
واعبر بفكرك كل الوان
الحدود
اللي رسمها
عقلك الباطن وسجنك
جوا منها
وخلقت قضبانك بنفسك
وفضلت واقف منتظر
والناس عيون ومبحلقه
امتى هاتخرج
من حدود الشرنقه
اخرج بقى
اخرج بقى
محمد الساعي
