خاص بالمسابقة في شعر العامية والتفعيلة
الاسم / رفعت حسن محمد حسن ( الشهرة : الأديب رفعت السنوسي )
مصر . محافظة الجيزة . العجوزة
قصيدة “خطوط الدهر”
……………………………………………………………
يِهَاجِر قَلْبَك العاشق
يِلِفْ السكة فِ العتمة
تغيب الدنيا كالعادة
تتوه الفكرة فِ الزحمة
لِنَفْسِ القَهْر والآهة
تِعُود لِليَأس مِنْ تَاني
تِمُوت جواك غَنَاوِيهَا
تقول بالقلب آه ياني
ويفضل حُبَها راشق
يضم همومي جُوَايا
وقلبي للوطن عاشق
ونِفْسِي ألقَى ضِلَايَة
وقَلْبَك عُمْرُه بِيْهَاجِر
يِلِفْ الدنيا وِيسَافِر
وبتعاند وِتِتْجرَدْ
وتخسر كله فالآخر
وتِنسَى إننا واحد
وتِنسى إننا أصحاب
وتنسَى حلمنا الواحد
وتِنسَى إننا احباب
وليه يا شر أيامنا
بتحصد عمرنا منا
وتسرق كل فرحتنا
وتعمل دَمنا حِنَة
وليه فِ قلوبنا تتسلى
وتزرع ذُل فِ عيونا؟
تصحينا إذا حلمنا
على كوابيس بتفزعنا
دموعي ناشفة ما بتنزل
قتلها الغدر ف خشوعي
همومي ساكتة ما بتنطق
وأمي ساكنة ف ضلوعي
وأمي قاعدة شقيانة
وف ايديها خطوط الدهر
منقوشة كما البرواز
على جبينها حروف القهر
ومين هيقول دي انسانة
ويروي قلبها الاخضر
وليه سبتوها عِريانة
بضحكة وِشِكم الاصفر؟
لأني في الوطن شاعر
وجوا شعوري بالقَهَرة
تنادي مصرنا المُهْرَة
وترفع عننا الحسرة
حكاوي لسة هتقولها
وراجعة تاني ضحكتها
هتحكيلنا وهتغني
عن اللي شالوا دمعتها
عن ناصر وعن أنور
وع الأزهر وصولاتوا
وعن غيرهم كمان أبطال
بيدوا مايقولوش هاتوا
وهي كلمة مصرية
طريق واحد وراح نمشي
وهي إرادة شعبية
يا إما نكون يا مانكونشي
